Minority SafePack, sostëgn dla Regiun ala campagna
Stanziamënt dla Regiun ala FUEN por la campagna Minority SafePack por la sconanza dles mendranzes linguistiches
Minority SafePack é la campagna dla FUEN (Uniun federalistica dles nazionalités europeiches) che á le fin da cöie adöm cina ai 3 d’aurí n miliun de sotescriziuns por la sconanza dles mendranzes linguistiches, cun le limit assegné a vigni paisc mëmber dl’UE arjunt te altamo 7 Stac. Tl’Europa él feter 50 miliuns de porsones che fej pert de na mendranza etnica o linguistica y te tröc caji ne vëgni nia sconá; la campagna reverda ince les mendranzes dl raiun talian olache an s’á tut dant da arjunje 55mile sotescriziuns. L'obietif de Minority SafePack é chël da fá a na moda che la sconanza dles mendranzes vëgnes garantida te döta l’UE tres l'aprovaziun de mosöres che messará ti gní sotmetüdes ala Comisciun europeica. Tó pert pó dötes les zitadines y düc i zitadins europeics che á cumplí 18 agn; por sostigní la campagna tlechel jí sön www.deboriada.bz.
La campagna vëgn ince sostignida dala Regiun Trentin Südtirol y l'assessur regional por les mendranzes Giuseppe Detomas sotrissëia che "al é dër important da valorisé les desfarënzies linguistiches y culturales che é te döta l’Europa, ajache ares rapresentëia na richëza de düc. Al é da dé inant le messaje che al é dërt che düc fejes pert y sotescries le Minority SafePack, nia ma che che fej pert de na mendranza". Tl’ultima sentada á la junta regionala, cun a ce le presidënt Arno Kompatscher, renové l’adejiun anuala ala FUEN, preodon n stanziamënt implü propi por sostigní le proiet Minority Safepack.
USP
