Dala Junta: Les dezijiuns plü importantes
La Junta á traté te süa sentada de plü temesc: dala cianapia terapeutica, ai contribuc por tëc da scianores, al program dla STA y le frabiché abitatif.
Löm vërda al program anual dla STA
Sostëgn a proiec de mobilité sostenibla, gestiun dla linia dla ferata Maran-Malles y dl patrimone imobiliar dl trasport publich, planificaziun y comunicaziun de scomenciadies por la segurëza: chisc é i punc zentrai dl program d’ativité dl 2018 dla STA (Strotöres dl trasport dl Südtirol) lauré fora en colaboraziun cun le Departimënt Mobilité, y aprové incö (ai 27 de merz) dala Junta provinziala. L'esecutif á metü a desposiziun por chësc ann 4,79 miliuns de euro. Por ci che reverda le finanziamënt él la gestiun ordinara dla linia dla ferata dla Val Venosta che costa le plü y plü avisa 3,37 miliuns de euro. Le sorvisc de trasport de porsones vëgn surantut dal conzescionar SAD, deperpo che STA é le patrun y gestur dla linia y dles infrastrotöres
Cianapia terapeutica: la Provinzia surantol i cosć
La Junta provinziala á implü fat fora incö ai 27 de merz che les preparaziuns a basa de cianapia terapeutica pó gní dades fora dales farmazies. La prescriziun ne pó nia superé la cuantité preodüda al mëis. I preparac a basa de cianapia terapeutica smendrësc le dolur, fej gní fan, relassëia i muscui y pó gní adorá por maraties sciöche la scleorsi multipla y le sindrom de Tourette. La Junta á aprové che te chisc caji sarál le Sorvisc sanitar provinzial che surantol i cosć dles terapies, sciöche ince por cures por maraties oncologiches, le glaucoma, l’HIV y la terapia classica dl dolur. “Sciöche ince te d’atri caji sarál la man publica che metará a desposiziun les ressurses por finanzié les terapies cun cianapia. Cina sëgn él sté söporjö 100 paziënc che s’á anuzé de chësta terapia paian instësc”, á sotligné le presidënt dla Provinzia Arno Kompatscher tratan la conferënza stampa.
I produc a basa de cianapia podará ma gní scric dai doturs de medejina generala sce la diagnosa y le plann terapeutich é gnüs definis da un di zëntri spezialisá di ospedai y dles strotöres dl’Aziënda sanitara provinziala. Na pert dles raziuns dla cianapia terapeutica vëgn coltivades pro l’Aziënda speziala dles forzes militares a Firenze. La cuantité che vëgn coltivada te chësta aziënda é scrita dant y ti corespogn ales nezescités comunicades dales Regiuns y Provinzes cina ai 31 de merz de vigni ann al Ofize por les dependënzes dl Minister dla Sanité. Tl Südtirol é la cuantité por le 2018 de 10 chili: 1 n chilogram vëgn da Firenze, i atri 9 chili vëgn la maiú pert dal’Olanda y dal Canada. Le cost stimé de chësta operaziun é de zirca 250.000 euro.
Alisiraziuns dl frabiché, 68 miliuns a desposiziun
Nátra dezijiun dla Junta provinziala é stada chëra sön i mesi finanziars por les alisiraziuns dl fabriché por cumpré, costruí y recuperé les abitaziuns por zitadins dl’Uniun europeica y zitadins nia dl’UE dl 2018. “La ciasa é n bëgn primar - á dit le presidënt dla Provinzia Arno Kompatscher - y porchël orunse sostigní sciöche al alda i bojëgns dles families che ó cumpré, costruí o renové süa abitaziun. Le program de intervënc complessif prevëiga n stanziamënt de 68,7 miliuns de euro”.
Le vizepresidënt y assessur provinzial por le frabiché abitatif, Christian Tommasini ajunta che “por mirit dles alisiraziun s’alza la cualité dla vita dles families dl Südtirol. Al é da dí che chësc ann é i fonds chersciüs cotan y che i un dé fora dl 2017 51,4 miliuns”. Por fá fora la spartiziun di fonds él gnü tut i dac coiüs adöm dal’Astat dl 2016. Da chisc resultëiel che dan da dui agn êl tl Südtirol 493.159 zitadins comunitars residënc, che foss le 94,07% dla popolaziun. I zitadins nia dl’Ue ê 31.097 che foss le 5,93%. Tignin cunt de chisc dac y dl bojëgn él gnü preodü por zitadins nia dl’Ue le 4,88% de düc i fonds, che foss 3,3 miliuns. "Dl 2017 ê la cuota por i zitadins nia dl’Ue dl 5,25%", á sotrissé Kompatscher.
Tëc da scianores: mudaziuns criters por i contribuc
Implü á la Junta provinziala ince dé süa aprovaziun ales mudaziuns di criters por i contribuc por ci che reverda i tëc da scianores. I contribuc reverda intervënc de mantignimënt y sconanza dl paesaje. La regolamentaziun nöia jará en forza le de do la publicaziun tl Boletin ofizial dla Regiun Trentin_Südtirol. LEs domandes do n contribut podará gní fates cina ai 30 d’aurí dl 2018, impede che cina ai 31 de merz. Por de plü informaziuns prëibel consulté la plata internet aposta.
USP
Galaria dales fotografies
