Minority SafePack: Les mendranzes é n tema dl’Europa
Cun l’arjunjimënt dl quorum é la sconanza dles mendranzes deventé n tema europeich dij le presidënt Kompatscher porsura le resultat dla scomenciadia popolara.
Da püces ores, plü avisa dales 24 da inier, ai 3 d’aurí s’á stlüt jö la racoiüda de sotescriziuns dla scomenciadia popolara dla FUEN (Uniun federelastica dles nazionalités europeiches) Minority SafePack sön la sconanza dles mendranzes. Ince le presidënt dla Provinzia y dl’Euregio Arno Kompatscher â invié a sotescrí. Sëgn ti dál espresciun a süa sodesfaziun por le resultat arjunt: "Sides a livel europeich él gnü arjunt le quorum de indöt n miliun de sotescriziuns, che ince tla Talia él gnü arjunt les 54.750 sotescriziuns che al jô debojëgn, porchël mëss sëgn la Comisciun dl’UE se dé jö cun le tema mendranzes. Insciö devënta la sconanza dles mendranzes n tema dl’Europa."
"Cun süa sotescriziun mostra la jënt dl Südtirol da öna na pert che la desvalianza culturala y linguistica é n valur ajunté che dess ince tl dagní gní mantigní y de chël che an dess ciaré tl’Europa", insciö le presidënt dla Provinzia Kompatscher, "ara é a öna cun n’Europa dles regiuns che ti reconësc ales mendranzes la lerch y le respet che vá debojëgn y les scona te süa particolarité, ti garantësc süa suraviënza y conzed so svilup"
Le presidënt dla provinzia rengrazia ince döta la jënt dl Südtirol: "Le Südtirol á n’autonomia che pó ester n ejëmpl. Tl’UE virel feter 50 miliuns de porsones che toca o pro na mendranza etica o pro na mendranza linguistica – tröc ne vëgn daldöt nia sconá. Cun süa sotescriziun á la jënt dl Südtirol metü ala proa süa solidariteté devers d’atres mendranzes", dij le presidënt dla Provinzia Kompatscher. Sëgn mëss la Comisciun dl’UE se dé jö cun le tema y lauré fora mosöres ti ciamps lingac de medranza y regionai, formaziun y cultura, politica regionala, partezipaziun, avalianza y sorvisc di media audiovisuai por sconé sciöche al alda les mendranzes.
USP
