Formes d’abité nöies por porsones cun handicap: n ejëmpl
La colaboraziun cun d’atres strotöres y cun l’ënt publich ti conzed ala Lebenshilfe da realisé formes d’abité personales por les porsones cun handicap.
Dal dezëmber dl 2014 inant él gnü cherié le sorvisc de coordinamënt de proiec dl’abité da pert dl’assoziaziun Lebenshilfe, che manajëia danterater ince n apartamënt a Balsan de proprieté dl IPES. Te chësc apartamënt virel Max, 23 agn da Suc y Alexander, 24 agn dl Sarenthein. Tramidui á döt le de debojëgn dl’assistënza de dui operadus. N terzo operadú i dëida spo ince tratan la nöt. L’obietif primar dl sorvisc dla Lebenshilfe é chël da identifiché, adöm a de plü organisaziun dl medemo setur, les mius soluziuns por formes d’abité personalisades por porsones cun handicap.
“Ince por mirit de n contribut dal titul vita independënta y partezipaziun soziala paié fora dala Provinzia él poscibl da garantí a porsones che á dificoltés fisiches da avëi a desposiziun n’assistënza de 9 ores al de sciöche valur mesan”, á sotligné l’assessuria provnziala Martha Stocker che á vijité l’abitaziun de Max y Alexander. Por ciafé chësc contribut él nezesciar da abité te na manira autonoma demez dala familia, da ne avëi nia superé i 60 agn y da ester bugn da gestí te na manira valgamia autonoma la permanënza tl’abitaziun. Chësta forma de finanziamënt ti conzed ales porsones interessades da manajé te na forma autonoma süa vita y da avëi ince a desposiziun na certa liberté finanziara. Por l’assessuria provinziala dess “chësta forma de organisaziun dl’abité gní ampliada”. Max fej dötaurela n practicum pro la Lebenshilfe y sona ince pro la band musicala “Chaos Junkies”, Alexander indere á cherié sön internet n blog de iadi.
.
USP
