Teßmann, ai 20 d’aurí conferënza söl aprendimënt linguistich
L’imparé la gramatica sará tl zënter de na sëra d’informaziun ai 20 d’aurí tla biblioteca Teßmann cun la logopeda Silke Kruse.
Sovënz vëgnel cunté de tan saurí che i mituns impara la gramatica de n lingaz. Tres la gramatica portunse a espresciun tröp: ara nes conzed da trasformé parores te frases che é ó dí val’. Ara nes conzed da baié te vigni momënt de cosses, porsones y esperiënzes, ince sce al é bele dî ca o sce al dess impormó sozede. Y al é la condiziun de basa por na comunicaziun zënza malintenüdes. I mituns de cater agn á bele bele na gran competënza gramaticala, che ai miorëia ti agn de scora. Mo al é ince impedimënc sön le tru che condüj a n lingaz che é a livel gramatical corët, sciöche le svilup dl lingaz de n valgügn mituns desmostra. Co imparon pa pordërt la gramatica? Co pa pa i geniturs sostigní sü mituns? Y da ci degré de dificoltés gramaticales vál pa debojëgn de na terapia?
A chëstes domandes porvará da dé resposta la logopeda y linguista clinica Silke Kruse tratan n’incuntada tla biblioteca provinziala Teßmann (strada Armando Diaz 8) a Balsan. Tratan la conferënza, che é sön le program en vëndres ai 20 d’aurí dales 20 inant, spliga Kruse te so referat sciöche i mituns impara la gramatica y da ci vari dl svilup che chësc depënn, sciöche an pó sostigní i mituns y ci che le desturb linguistich desgramatism é. La manifestaziun vëgn organiasada adöm al ofize linguistich dl Istitut cultural dl Südtirol. L’entrada é debann. Le referat sará por todësch.
Info: www.tessmann.it
USP
