Le volontariat jonil: surandada dles onoranzes ai 18 de ma a Hall
Por sües prestaziuns d’ezelënza tl volontariat jonil vëgnel premié le proscim vëndres a Hall tl Tirol ince cinch jogn y jones dl Südtirol. Ince na ladina lapró.
Ince sce les jones y i jogn á impormó dai 22 ai 33 agn, é so impëgn y süa dediziun al volontariat jonil de gran ejëmpl. Por i rengrazié por sü miric organisëia la Provinzia de Balsan y chëra dl Land Tirol por le secundo iade adöm l’onoranza “Prestaziun d’ezelënza – Le volontariat jonil“. Le pest ti gnará surandé a Valentina Barbolini da San Martin de Tor, Dominik Alber da St. Martin in Passeier, Martin Kemenater dal Sarntal, Ancilla Lechner da Kurtatsch y Simon Pircher da Lana.
La surandada dles onoranzes gnará a se le dé
en vëndres, ai 18 de ma dl 2018
dales 19.00
tl “Salzlager”
a Hall tl Tirol. Les onoranzes gnará surandades dai presidënc Arno Kompatscher y Günther Platter. “Cun chësta onoranza oressun ti dé visibilité al gran laur de volontariat che i jogn y les jones fej te nosta Provinzia y al dess ince ester n impuls por i atri, da se dé jö cun ativités de volontariat”, dij le presidënt Arno Kompatscher. Por ci che reverda le Südtirol vëgnel ince premié a Hall tl Tirol l’organisaziun jonila dl Alpenverein y la Lia dles Musighes dl Südtirol por so laur por i jogn. N’onoranza ti gnará ince surandada al proiet por i jogn dla Crusc Blancia che á inom “Helfmo MITnondo”, cun chël che al ti vëgn dé importanza ales conescënzes de pröm aiüt por i jogn.
USP
