Fonds sozial europeich: 2,7 miliuns de plü por proiec FSE
I proiec ametüs é preodüs por porsones che damana asil, porsones cun handicap y vitimes de violënza. Popolaziun tres plü vedla, sostëgn ince a lauranc plü vedli
La Junta provinziala á aprové incö (ai 15 de ma) l’integraziun dla dotaziun finanziaria por l’avis publich por "Aziuns por renforzé les competënzes y l’acompagnamënt al laur de porsones vulnerables- ann 2017/18" che fej pert dl Program operatif FSE 2014-20. L’avis preodô da alisisiré l’integraziun dles porsones plü vulnerables, che se stënta da rové sön le marcé dl laur: porsones cun handicap, porsones cun dependënzes, porsones che é stades te porjun, vitimes de violënza o de gran sfrutamënt y tl prigo de descriminaziun, migranc (cun lapró che che damana asil), benefiziars de proteziun internazionala, porsones sot i dejedot agn foresti nia acompagná che complësc tosc 18 agn, mendranzes etniches reconesciüdes, porsones zënza na ciasa fissa. Por chësc avis êl gnü metü a desposiziun 5 miliuns de euro.
Por le pröm iade él plü domandes co fonds desponibli
Por le pröm iade da canche al é le Program operatif 2014-20 él gnü damané por i proiec ametüs al finanziamënt na soma plü alta co chëra desponibla. Por finanzié i proiec ametüs vál debojëgn de indöt 7,7 miliuns. La gradatöra definitiva gnará publicada sön le BOR en mercui, ai 24 de ma. La Junta á porchël preodü l’integraziun de mesi finanziars a desposiziun por indöt 2,7 miliuns de euro, metüs adöm por le 50% da fonds Ue dl FSE (1.350.000 euro), por le 35% da fonds statai (945.000 euro) y por le 15% da fonds provinziai (405.000 euro). Tla sentada da incö á la Junta provinziala ince mudé la prenotaziun de spëisa por la bandida dl FSE por "Intervënc de formaziun por renforzé les competënzes y l’acompagnamënt dl laur de lauranti plü vedli - Ann 2017/18". Tl cheder de chësc obietif strategich él gnü azeté 10 proiec por indöt 1.127.494 euro. Ara se trata de n investimënt araté strategich dal esecutif provinzial, "ajache l’invedlimënt dla popolaziun é na dinamica demografica che interessëia gran pert dl’Europa y tla provinzia de Balsan portel pro a na sbürla dla fin dl laur dla majera pert dla popolaziun" á dit le presidënt dla Provinzia Arno Kompatscher.
USP
