Sön internet: les scolines se presentëia por le pröm iade deboriada
Cun la reelaboraziun dles plates web dla Provinzia él sëgn por dötes les scolines dl Südtirol n su portal internet.
La misciun dla plata nöia dl ciamp scolina é http://www.provinz.bz.it/scolina. “Por mirit dla colaboraziun di trëi ispetorac en colaboraziun cun les direziuns dles scolines y dl acompagnamënt tecnich dla Südtiroler Informatik AG éra por le pröm iade jüda da cherié deboriada na presentaziun unica te internet por les scolines todësces, talianes y ladines dla provinzia“ dij cun ligrëza Waltraud Deeg, l’assessuria provinziala por la tecnica informatica. I vantaji é bëgn tlers: les anuzadësses y i anuzadus á la poscibilité da odëi sön öna na plata web ci che al sozed te dötes les scolines dla provinzia, da ciafé informaziuns d’ütl, p. ej. por ci che reverda les iscriziuns o le calënder dl ann de scolina y al é öna na banca dac por les misciuns de dötes les scolines.
Cun n layout dla plata web plajor y n motor d’inrescida potënt vára da chirí sö düc i contignüs te na manira saurida. Implü é la plata internet nöia programada sciöche "plata web responsive", chël ó dí che ara vëgn mostrada sö coretamënter sön düc i terminai. Por i assessurs por la formaziun Florian Mussner, Christian Tommasini y Philipp Achammer é la plata web nöia dër progredida: “Che propi le pröm scalin dla formaziun tl Südtirol ais sëgn deboriada na plata web é aladô de Mussner na cossa orientada al dagní. I speri che chësc pois ester d’ejëmpl ince por d’atri ciamps olache al é dancá ci che an á deboriada y impó él lerch por la singolarité“ á dit l’assessur ladin. “Na plata internet por les scolines de düc i trëi grups linguistics che tol ince en conscidraziun les particolarités de vignun é n salt de cualité important y por chësc rengraziëii dötes les porsones che á dé n contribut“ é les parores de lalt por la plata internet nöia dl assessur Tommasini. “Cun chësc portal internet nü vëgnel tigní cunt dl bojëgn d’informaziun dl personal spezialisé sciöche ince dles families meton a desposiziun dötes les informaziuns te na manira tlera y dantadöt orientada ai grups spezifics desvalis“ á alzé fora l’assessur Achammer.
USP
