Mobilité incër Balsan: trëi dezijiuns dala Junta
Furnadoia nöia cina San Senese, aprovaziun de döes operes stradales a Balsan Süd: la Junta provinziala s’á dé jö cun la mobilité dl capolüch.
Al é dl architët Marco Sette le proiet che á davagné le concurs de idees por la furnadoia nöia che porta a San Senese sura Balsan. La trassa romagn chëra atuala, al gnará indere aumenté le numer de passajiers. Le proiet de Sette é gnü chirí fora da na iuria de esperc dl setur, danterater rapresentanc dla Provinzia y di Comuns de Balsan y San Senese. La motivaziun por le pröm post é stada l’integraziun otimala dl proiet tl ambiënt y tla contrada, la funzionalité y l’identité sterscia dl’opera. “Les novités plü granes é che la staziun a val gnará fata daldöt danü, sciöche ince chëra a munt, che gnará ince spostada n pü’ ”, spliga l’assessur por la mobilité Florian Mussner. Tla staziun a Balsan dessel ince gní realisé n infopoint, 55 posć por i auti da parché y 200 posć por les rodes. Ince tla staziun a San Senese él preodü n infopoint y 90 posć por les rodes. La fasa de proietaziun dess gní stlüta jö iniann, dl 2019 gnará spo scrit fora i laurs che dess scomencé d’altonn dl 2019.
La Junta provinziala á ince aprové te süa sentada ai 29 de ma les carateristiches tecniches dl secundo y terzo lot dla zirconvalaziun de Balsan. Al é preodü rondí nüs sides sön la strada Einstein a Balsan Süd che ince de coliamënt cun la Mebo. L’opera é ponsada por fá zircolé damí le trafich tla zona de Balsan Süd. Por i loc dui y trë él preodü, do le mudamënt dles carateristiches tecniches, n investimënt de 59 miliuns de euro. “Tl metëman él preodü na spëisa de 80 miliuns, insciö sarál poscibl da sparagné 20 miliuns de euro”, dij l’assessur por la mobilité Florian Mussner. Indöt él preodü cater loc. Porvia de na convenziun danter la Provinzia, le Comun de Balsan y l’autostrada dl Prener sarál ince l’autostrada dl Prener che contribuësc al investimënt.
N ater proiet che reverda la mobilité dlungia Balsan é la creaziun de dui rondí pro l’incrujada dla MeBo cun la strada statale che porta da Kaltern/Eppan a Balsan. La Junta provinziala á aprové sön proposta dl assessur por la mobilité Florian Mussner ai 29 de ma les carateristiches tecniches dl’opera. Al é preodü n investimënt de 13,9 miliuns de euro. L’obietif prinzipal é chël da fá zircolé le trafich plü debota cun ince vantaji por la segurëza stradala.
USP
Galaria dales fotografies
