Asos de rehl, apel da i lascé en pesc
I asos de rehl mëss vire tla natöra, sce ai vëgn portá a ciasa ne ési nia plü bugn da jí zoruch te so habitat natural. Comunicaziun dla Repartiziun Bosć.
Chi che fej na spazirada te bosch o che vá sö por munt pó storje pro de pici asos de rehl che pé ester da susc zënza uma. Te prësc degun caje n’é i asos gnüs arbandoná dala uma y porchël él n comportamënt dër falé da i aziché o, ciamó peso, da i porté a ciasa minan da ti salvé la vita. L’apel dla Repartiziun Bosć é porchël da ne i desturbé nia, deache “i tiers salvari é te so habitat natural, olache ai á les mius condiziuns de vita y pó se möie te na manira lëdia zënza impedimënc”. Ince sce an incunta n asó che é gnü arbandoné desson contaté i verdaciacia o la forestala che se crüzia spo inant di tiers.
Por ci che reverda i asos de rehl él daldöt normal che la uma lasces le tier dassú por jí a chirí da mangé. Ara vëgn spo zoruch te intervai regolars por controlé la situaziun. I pici ne tofa da nia y chësc é n gran vantaje, deache por ejëmpl les olps se möi aladô di tofs.
Porchël él les porsones che porta a ciasa asos che ne fej nia ma n’aziun che ne joa a nia, mo che ti fej dann al tier instës. N iade che al é aldinfora de so habitat natural él dër ri che al sides indô bun da se adaté a vire tla natöra. Porchël é le consëi chël da lascé en pesc asos sce an i incunta tla natöra.
USP
