Eletrizité por malghes y üties da munt: adatá i critérs por contribuc
La Junta á aprové les diretives nöies por i contribus tl setur dla fornidöra y dla destribuiziun de energia tl setur rural.
Cun döes deliberes nöia á la Junta provinziala stabilí te süa sentada ai 19 de jügn critérs nüs por la conzesciun di contribuc tl setur dla fornidöra y dla destribuziun de energia. Löm vërda á bele i critérs nüs ciafé dal Consëi di Comuns y dala mësa de esperc söl energia. “I critérs é gnüs adatá por garantí la destribuziun eletrica söl teritore provinzial te na manira ciamó plü efiziënta co aldedaincö” á splighé l’assessur provinzial Richard Theiner.
Öna na delibera reverda insciö i contribuc por la costruziun de implanc idroeletrics nüs y dl ampliamënt de implanc bele esistënc. Implü vëgnel ince regolamenté la forndiöra cun energia eletrica de imobili che ne é nia sön la rëi eletrica. Chësc reverda dantadöt üties da munt y malghes por chëres che al ne é nia poscibl da realisé na rëi eletrica te na manira sostenibla y cun tröpes dificoltés tecniches.
Tl secundo caje se referësc le provedimënt ai contribuc a bëgn dles impreses che spartësc fora enegria eletrica por coliamënc ala rëi eletrica de malghes y üties da munt, por le barat o le potenziamënt de implanc de spartiziun de energia eletrica tles zones rurales, por le ciavé ite de lines dl’aria, sciöche ince por la costruziun danü dla rëi eletrica destrüta da desgrazies naturales.
I critérs nüs, do l’aprovaziun dla Junta provinziala, gnará notificades ala Uniun europeica. N iade che la notifica è fata jará i critérs nüs en forza. Les domandes nöies de contribut podará gní presentades, dan le scomenciamënt di laurs, al Ofize Eletrificaziun, strada Mendola 33 a Balsan. L’ofize pita ince informaziuns sön les modalités da fá domanda y sön la documentaziun nezesciara. Les diretives nöies, en iade che ares jará en forza, sará ince aplicades ales domandes bele rovades adalerch mo nia ciamó tratades.
USP
