Dolomitesvives: la sperimentaziun por na mobilité sostenibla vá inant
Inann sarál döes scomenciadies che reverda le conzet de #dolomitesvives: da öna na pert sön le Ju dl Sela y dal’atra pert söl Lech de Braies.
N conzet inovatif y sostenibl por fá esperiënzes tl monn alpin, sides por residënc co ince por turisć, cun le fin da stravardé les Dolomites dal trafich, dales emisciuns y dala vera acustica. Chësc é le fin dla Provinzia cun le proiet de #dolomitesvives, che inann gnará a se le dé por le pröm iade te dui posć desfarënc, da öna na pert söl Ju dl Sela y dal’atra pert söl Lech de Braies. La presentaziun dles döes iniziatives é gnüda a se le dé incö ai 22 de jügn tl Palaz Widmann a Balsan cun i assessurs Florian Mussner y Richard Theiner por la Provinzia de Balsan y Mauro Gilmozzi por chëra de Trënt.
Sconé les Dolomites sciöche patrimone UNESCO, á sotligné l’assessur provinzial por l’ambiënt Richard Theiner, tol ite ince la gestiun dla sostenibilité nia ma por la natöra, mo ince por les porsones, l’economia y l’ambiënt. L’assessur por la mobilité Florian Mussner á recordé l’ampliamënt dl’oferta de trasport publich y á damané a düc da lascé a ciasa l’auto y de adoré i mesi dl trasport publich. L’assessur Mauro Gilmozzi á sotligné che ara ne vá nia ma de n cambiamënt de orars, mo de n cambiamënt cultural: la sfida é chëra da adoré i mesi publics y da chirí soluziuns adöm ala comunité. La buna colaboraziun danter les döes Provinzies gnará ince tosc ampliada al Veneto, che dess fá pert dla mësa torona da setëmber 2018 inant.
Proa por smendrí le trafich söl Ju de Sela
Do na pröma sperimentaziun fata tl 2017 cun la stlüta al trafich vigni mercui d’isté, gnarál inann fat na scomenciadia nöia de limitaziun dl trafich. “Do chësta fasa de sperimentaziun orun spo rové le proscim ann a na soluziun definitiva por la mobilité sostenibla söl Ju dl Sela por le 2019”, á splighé Theiner. L’obietif é da smendrí le trafich cuotidian dl 20 porcënt. Chël ó dí che dansimdé dessel passé cina 200 auti, domisdé danter 100 y 150.
Les limitaziuns dl trafich gnará a se le dé dal 23 de messé ai 31 de agost dl 2018, dal lönesc al vëndres, dales 09.00 ales 16.00. “Al podará rové söl Ju dl Sela cun n pass debann che ará na validité de n ora y che an pó damané diretamënter pro les posiziun de informaziun y registraziun posizionades dlungia la strada te trames dles direziuns”, á splighé Florian Zerzer. Por ci che reverda al pert de Gherdëna sará i punc d’informaziun pro l’ex Hotel Miramonti a Plan de Gralba y a Ruacia a Santa Cristina. Por ci che reverda le Trentin sará i punc pro le Lupo Bianco a Mazziun sciöche ince a Cianacëi y Alba.
Implü sarál ince poscibl da ciafé i pass online le de dan la jita tres la App Open Move. Jí sö debann zënza limitaziuns pó i veicui eletrics, les rodes, chi che vá a pe, i mesi publics, i ghesć di hotí söl Sela, les porsones che laora lassö y mesi d’emergënza. Les autorisaziuns aposta gnará fates dai Comuns.
Al gnará ince potenzié l’oferta dl trasport publich. “Vigni 15 menüc, sides danmisdé co ince domisdé, dessel gní metü a desposiziun n coliamënt cun corieres da Urtijë por arjunje le Sela”, á dit l’assessur Mussner recordan ince che an pó adoré les furnadoies sciöche pro ejëmpl chëra de “Saslunch”.
Lech de Braies: stlüta da misdé por i auti
Por ci che reverda le Lech de Breis gnarál stlüt la strada dai 16 de messé ai 16 de setëmber dales 10:30 ales 14:00 por smendrí le trafich de vijitadus che vá cun l’auto a fá la roda dl lech. L’assessur Mussner á fat l’apel da adoré i mesi publics che gnará potenziá cun de bugn coliamënc ince cun les staziuns dles ferates. Tratan les ores de stlüta podará passé les corieres de linies 442 da Toblach y le sorvisc shuttles da Welsperch. Por le sorvisc de shuttle messarál gní paié 3 euro a porsona y iade. Al gnará ince daurí na zona da parchené nöia dlungia la localité Schmieden. Da dailó pon ince jí a pe por rové al lech de Braies sön la sëmena 1.
N video de spligaziun dl proiet pó gní desciarié chiló.
USP
Galaria dales fotografies
