Incuntada de comié dl general Mennitti dal presidënt Kompatscher
Le general Mennitti lascia le Comando regional di Carabinieri. Vijita de contlujiun da Kompatscher che lalda Menniti por so impëgn por le bi- y trilinguism.
Do da trëi agn lascia le general Massimo Mennitti le comando dla Legiun Trentin-Südtirol dl’Arma di Carabinieri. Incö danmisdé, ai 25 de jügn él sté la vijita de comié de Mennitti dal presidënt dla Provinzia Arno Kompatscher a Balsan. Mennitti é nasciü a Solaneres y al é sté comandat regional da d’altonn dl 2015 inant, “renforzan la buna colaboraziun istituzionala cun l’aministraziun provinziala”, á sotligné Kompatscher. Le presidënt á recordé te na manira particolara i resultac ezelënc arjunc nia ma por ci che reverda le control dl teritore, mo ince por la formaziun de carabinieri nüs che conësc le talian y le todësch.
“Le general Mennitti – spliga Arno Kompatscher – á desmostré na gran sensibilité sön le tema dl bilinguism, ince deache al conësc dër bun sides le talian che le todësch. So impëgn te chësc setur cun resultac concrec de gran importanza é dër da laldé. I pënsi por ejëmpl ales bandides de concurs por i marescialli dl’Arma cun la ghiranza da avëi l’atestat de bilinguism. La presënza capilara sön le teritore dles forzes dl ordin che capësc trami dui i lingac é n segnal de gran sensibilité y de vijinanza ales esigënzes di zitadins”. Sot ala direziun de Mennitti él ince gnü fat la traduziun dl Calënder storich di Carabinieri por ladin y ince d’atres brosciüres d’informaziun é gnüdes traslatades sides por ladin dla Val Badia che de Gherdëna.
USP
Galaria dales fotografies
