Üties da munt: tosc dauriará la ütia nöia de „Schwarzenstein“
Cun le mëteman dla sajiun da d’isté deura tosc ince dötes les 26 üties da munt de proprieté dla Provinzia. 10 miliuns por laurs de prescia te 3 agn.
Tl Südtirol él indöt 90 üties da munt, de chëstes nen él 26 de proprieté dla Provinzia. Na ütia che é gnüda fata sö danü ti ultims mëisc é chëra de “Schwarzenstein”amesa les Alpes dl Zillertal. L’inauguraziun dla ütia nöia é preodüda por i 21 de messé. Cun le mëteman dla sajiun da d’isté ince por i ostis sö por munt él sté la Junta provinziala che á fat te süa sentada incö na suraodüda dla sitaziun te chësc setur. Cun le passaje dles strotöres tl 1999 dal Stat ala Provinzia él sté meso da scomencé cun i laurs de ressanamënt y da stlarí les chestiuns che reverda les conzesciuns y les bandides por la gestiun.
“Tl 2014 unse scomencé cun n program de investimënc che prevëiga vigni ann na soma de 550.000 euro por la manutenziun”, á splighé le presidënt dla Provinzia Arno Kompatscher. Tl medemo tëmp él ince sté poscibl da colié le 95 porcënt dles üties da munt ala vëta leria tres i coliamënc cun satelit che garantësc da avëi conzesciuns de internet asveltes y de buna cualité, insciö Kompatscher. Le program di intervënc prevëiga l’esecuziun de laurs de prescia cina le 2021 por na soma de indöt 10 miliuns de euro. I laurs vëgn fac aladô de na lista de priorités stabilida dala Repartiziun Aministraziun dl patrimone tl contrest de na comisciun paritetica cun rapresentanc de CAI y AVS.
“Fá laurs de manutenziun y costruziun sö alat é na sfidada dër complicada ince por l’aministraziun publica che prevëiga prozedöres dër avisa”, á ajunté Kompatscher. Por le momënt él tla fasa de elaboraziun ince les conzesciuns da frabiché por laurs che reverda de plü üties, danter chëstes ince la Ütia de Dantersasc, la Ütia Zsigmondy Comici y la Ütia Vedretta Pendente. La lista cun dötes les üties provinziales é a desposiziun sön la plata internet dla Provinzia tla seziun dedicada ales üties da munt sot a: http://www.provincia.bz.it/amministrazione-patrimonio/temi/rifugi-alpini.asp.
USP
Galaria dales fotografies
