Arge Alp: Presidënza al Südtirol, ressoluziun söl lu
Tratan l’incuntada di presidënc dl’Arge Alp él gnü aprové na ressoluziun söl lu. Implü él i Grijuns che á surandé la presidënza al Südtirol.
I 10 presidënc dles Regiuns de Arge Alp s’á incunté incö danmisdé ai 29 de jügn a Scuol tla Svizra por la 49ejima conferënza di presidënc. L’Arge Alp é la comunité de laur che tol ite dötes les 10 regiuns dles Alpes y che promöi proiec de colaboraziun transfrontaliera: al nen fej pert le Paiern, i ciantuns svizeri di Grijuns, de Sogn Gagl y dl Tessin, les Provinzies de Balsan y de Trënt, la Regiun Lombarida, sciöche ince i Länder dl’Austria de Salzburg, Tirol y Vorarlberg.
Danter les ressoluziuns fates tla sentada da incö él ince öna che reverda le lu. Tles Alpes vëgnel dötaurela cumpedé incër 60 tlaps de lus, de chisc nen él zirca le mez che vir tla Talia. An pó calcolé na popolaziun de indöt 500 ejemplars y por sconé l’agricoltöra da munt y conservé les sperses rurales él l’Arge Alp che ti damanda al’Uniun Europeica da smendrí le status de proteziun dl lu te n valgönes regiuns dla Talia. La ressoluziun á implü l’obietif da stabilí n monitoraje interregional y internazional por la gestiun dl lu.
La secunda ressoluziun reverda les prospetives de svilup por l’adoranza dl’energia idroeletrica, öna dles püces ressurses, cun chëres che les regiuns alpines pó davagné val’. Les 10 regiuns de Arge Alp se damana che al vëgnes fat intervënc coordiná cun l’obietif da garantí n svilup ecologich, economich y sozial dl’adoranza dl’energia idroeletrica, garantin insciö condiziuns valies te döta l’Europa por le sostëgn y le renforzamënt de energies renovables. L’obietif é da evité che l’energia idroeletrica ais svantaji por ci che reverda la promoziun de d’atres tecnologies o de mudamënc dl marcé. La terza ressoluziun reverda indere la tematica dla formaziun. Les Regiuns dla Arge Alp á detlaré da sostigní n renforzamënt di barac de esperiënzes tl setur dla digitalisaziun, ince por renforzé y colié damí les universités y i istituc d’archirida tles Alpes.
Ala fin dla sentada él sté la presidënta de rode atuala, Barbara Janom Steiner di Grijuns, che ti á surandé ofizialmënter la presidënza dl’Arge Alp al suranstant dl Südtirol Arno Kompatscher. Le presidënt dl Südtirol á dit da orëi renfozé inant le svilup dl teritore rural. “Les arees rurales fej pert de nosta identité y porchël mësseres gní renforzades”, á dit Kompatscher. Le raport danter les gran cités y l’ambiënt rural é n raport danter patria y identité cosmopolita. “Y la patria é nosta segurëza te n monn plëgn de mudaziuns che garantësc la segurëza nezesciara por podëi vire te n’Europa zënza confins”; á dit Kompatscher.
Trëi priorités por Kompatscher sará ince da combaté le problem dl spostamënt di zitadins dai paisc ales cités, la digitalisaziun y l’agricoltöra da munt. Kompatscher á ince anunzié da orëi istituí indô le pest Arge Alp por proiec de plurilinguism.
Info: www.argealp.org
USP
Galaria dales fotografies
