Regoles nöies de paiamënt por prestaziuns dl Pröm aiüt
La Junta provinziala á aprové incö na seria de regoles nöies de partezipaziun ala spëisa por les prestaziuns efetuades dal Pröm aiüt.
Aprovades dala Junta provinziala na seria de regöles nöies de partezipaziun ala spëisa por les prestaziuns garantides dal Pröm aiüt. En ajunta al ticket de 15 euro él preodü na cuota ajuntiva de 35 euro sön la basa dl codesc de “triage” dl paziënt. Les regoles nöies müda les normes esistëntes te döes perts: da öna na pert vëgn la valutaziun fata dal codesc dla triage y nia plü dal dotur y la soma da paié sará de 35 euro impede di 50 euro da denant plü la soma dles prestaziuns cina al mascimo de 100 euro.
La cuota ajuntiva de 35 euro mëss gní paiadasce ai paziënc ti vëgnel atribuí le codesc blanch/bröm o vërt por prestaziuns che ess podü gní spostades tl tëmp. Al mëss ince paié chësta cuota düc chi che s'á registré al pröm aiüt mo ne á nia aspeté ala contlujiun dla prozedöra. Al esist na seria de esenziuns al paiamënt dla cuota.
“Cun chësta regolamentaziun nöia nes consintará da stlarí caji te chi che al mëss gní paié le ticket y la cuota eventuala ajuntiva. N efet ajuntif de chësta mosöra dess ester le smendrimënt di azesc nia apropriá al Pröm aiüt y insciö dessel ince gní diminuí i tëmps de speta por i paziënc che á na nezescité efetiva dl pröm aiüt”, spliga l’assessuria por la sanité Stocker. Tl medemo momënt laorunsé ince sön le renforzamënt dla continuité assistenziala söl teritore tres n potenziamënt dla medejina de grup, insciö Stocker.
Implü á la Junta provinziala ince aprové incö la cumpra de mascinaries nöies por n import de 33,83 miliuns de euro por les strotöres nöies dl ospedal da Balsan. Al se trata de mascinaries tecniches sanitares , tl import él bele laite ince le spostamënt dles mascinaries. La soma complessiva é de 51,02 miliuns de euro plü IVA. De chisc él indere poscibl da adoré le 34,3 porcënt di mascinaries atuales y da les trasporté tla strotöra nöia.
USP
