De dl'autonomia, le portal web é online
Le portal web sön i 5 de setëmber, de dl'autonomia, é online. Tl zënter dla manifestaziun él i 20 agn de competënza sön les strades; n quiz ince sön Facebook.
Ai 5 de setëmber, aniversar dla sotescriziun dl'Acordanza de Paris, él le de dl'autonomia. Chësc iade sarál dui momënc tl zënter dles zelebraziuns: da öna na pert i 20 agn dl passaje dal Stat ala Provinzia dla competënza sön les strades, dal'atra la surandada dl Gran Ordinanza de Mirit, la plü gran onoranza istituzionala dla Provinzia de Balsan. Les scomenciadies sön le program vëgn partides sö sön la Plaza Silvius Magnago nöia, cun döes mostres sön la storia dla rëi stradala dl Südtirol, y Ciastel Tirol, olache al gnará dé n’onoranza a 3 porsones cun la residënza defora dal Südtirol che á porté pro te sü ciamps de laur al svilup dl Südrirol. Ince chësc ann é le de dl'autonomia sön le web; le portal www.provincia.bz.it/giornata-autonomia é online da incö danmisdé (27 d'agost).
Sön le sit, renové y ajorné respet al'ediziun dl 2017, él na pert storica sön l'autonomia, cun lapró na timeline che mostra sö les carateristiches y i passaji plü importanc por le Südtirol. Na gran lerch ti vëgn dada al program detaié dl de dl'autonomia, y dantadöt ai 20 agn de competënza dla Provinzia sön les strades. A pert döes mostres sön la Plaza Silvius Magnago y tl Palaz Widmann, por descurí n valgönes curiosités sön döt ci che reverda la rëi stradala "made in Südtirol", pón porvé fora le livel de preparaziun tres n quiz sön la plata Facebook ofiziala dla Provinzia de Balsan. Che che arjunj le majer numer ará la poscibilité da gní a se dô na picia scincunda en ocajiun dl de dl'autonomia tla Plaza Silvius Magnago.
USP
Galaria dales fotografies
