7 Comuns ladins: abitaziuns nöies ma plü a residënc
Lege dl teritore y dl paesaje: la Junta á stabilí i criters, i Comuns y les fraziuns olache al gnará resservé le 100 porcënt dles abitaziuns nöies a residënc
Te n valgönes arees dles Dolomites tl Südtirol é le numer dles secundes ciases cotan alt y chësc fenomen porta pro a n aumënt di prisc tles zones da frabiché cun conseguënzes ince por i zitadins residënc che oress frabiché y vëgn confrontá cun spëises finanziares dër altes.
La lege nöia sön le teritore y le paesaje dla provinzia de Balsan prevëiga che le 100 porcënt dles abitaziuns nöies dess ester convenzionades ti Comuns y tles fraziuns olache le numer dles secundes ciases é plü alt dl 10 porcënt, chël ó dí che ares sará tl dagní resservades por i residënc. La lege nöia é gnüda aprovada de jügn dl 2018 dal Consëi provinzial y publicada spo de messé dl 2018 tl Boletin Ofizial dla Regiun Trentin-Südtirol y jará en forza dal 1. de jená dl 2020 inant. Dui articui dla lege é bele jüs en forza le de do la publicaziun ai 13 de messé dl 2018. Un n articul regolamentëia danü la svenüda dl teritore y l’ater articul fej referimënt ala formaziun dl personal di Comuns.
La Junta provinziala á traté inier ai 25 de setëmber l’implementaziun dl regolamënt bele jü en forza (che müda l’art. 79-ter dla lege urbanistica) che obliëia la Junta da stabilí i Comuns y les fraziuns olache passa le 10 porcënt vëgn adoré sciöche secundes ciases. Por arjunje chësc obietif él gnü aprové döes deliberes cun i criters aposta y implü él ince gnü stabilí i 25 Comuns y les 26 fraziuns interessades. Le relevamënt é gnü fat dal Consorz di Comuns sön la basa dla cuta de sojornanza sciöche preodü dala lege regionala tl setur. Na porzentuala dër alta de secundes ciases é gnüda relevada tla Val Badia, te Gherdëna, tla Val de Puster y tl raiun de Deutschnofen.
Ti Comuns y tles fraziuns indicades dala Junta messará dötes les abitaziuns nöies ester convenzionades, chël ó dí resservades por residënc. Chësta desposiziun ne vëgn nia aplicada ales abitaziuns por chëres che al é bele gnü aprové na conzesciun da frabiché o por chëres che al é bele gnü presenté n proiet definitif al Comun competënt cina ai 13 de messé dl 2018.
Les abitaziuns convenzionades podará ester en posses ma de porsones residëntes da almanco 5 agn tla provinzia de Balsan o che á n raport de laur tl Südtirol. Le regolamënt aprové incö dala Junta sará varënt cina ai 31 de dezëmber dl 2019. Dal 1. de jená dl 2020 jará spo en forza la lege nöia cun na redefiniziun di Comuns y dles fraziuns. Al é preodü n control periodich y ajorné dla situaziun. Tla lista él da ciafé 7 Comuns ladins dl Südtirol (Badia, Corvara, Mareo, S. Cristina, San Martin de Tor, Urtijëi, Sëlva). Le su Comun che n’é nia te chësta lista é chël da La Val.
La lista di Comuns y dles fraziuns
25 Comuns
Badia, Altrei, Prener, Corvara, Mareo, Gsies, Hafling, Sanciana, Ciastel, Niederdorf, Valdaora, Plaus, Rasun-Anterselva, Renon, Senales, Le Sest, S. Cristina, San Martin de Tor, Urtijëi, Stilfs, Terenten, Toblach, Valsperch-Taisten, Welschnofen, Sëlva
26 fraziuns
Radein (Aldein), Eores (Porsenú), S. André (Porsenú), Raiscia (Bornech), Petersberg (Deutschnofen), Mühlbach (Gais), St. Valentin (Graun i.V.), Graun (Kurtatsch a.d.W.), Laiun, Tanirz (Laiun), Pawigl (Lana), St. Martin am Kofel (Latsch), Pfelders (Moos in Passeier), Unterfennberg (Margreid), Meransen (Mühlbach), Issing (Pfalzen), St. Jakob (Pfitsch), Braies Defora (Braies),Braies Daite (Braies), Walten (St. Leonhard in Passeier), Thuins (Sterzing), Gfrill (Tisens), Peterbühel (Fié), Prösels (Fié), St. Konstantin (Fié), Ums (Fié).
USP
