Les dezijiuns dla Junta provinziala
Nomina dl Diretur general nü dl‘Aziënda sanitara, proiet de promoziun de produc locai y ampliamënt di posć de laur por porsones cun handicaps.
La Junta provinziala á formalisé incö la nomina de Florian Zerzer sciöche diretur general dl’Aziënda sanitara dl Südtirol. Zerzer á 53 agn y á stlüt jö i stüdi de informatica pro l’Univeristé de Trënt cun spezialisaziun te informatica economica. Dal 2013 inant é Zerzer diretur dl Departimënt Svilup y teritore, ambiënt y energia. Denant él sté por döes legislatöres (dal 2004 inant) diretur dl Departimënt Familia, Sanité y Politiches soziales dla Provinzia. Al é ince sté a cé dal 2000 al 2004 dla Repartiziun Turism, Comerz y Sorvisc. Zerzer metará man dai 15 de otober sciöche diretur general dl’Aziënda sanitara. La Junta á aprové la nomina al’unanimité l’idoneité sön la basa de na lista de suranstanc fata da na comisciun aposta. La comisciun á dé löm vërda por l’idoneité ince a Irene Pechlaner, direturia dl Raiun sanitar de Maran y Thomas Schael, diretur general da denant.
Na dezijiun importanta dla Junta provinziala é ince stada l’aprovaziun dl proiet söla promoziun de politiches alimentares sostenibles. Al se trata de n pröm vare concret dl percurs fat fora cun le comissar europeich Vytenis Andriukaitis che é ince sté en vijita a Balsan. La sozieté IDM gnará inciariada da elaboré n plann por la realisaziun dl proiet. Al tolará pert al’elaboraziun dl plann ince i partners soziai y economics dl teritore sciöche le Bauernbund, le HGC o le Zënter de sperimentaziun dla Laimburg. Le proiet á trëi fondamëntes: le raforzamënt dles strotöres de produziun y destribuziun de produc alimentars locai, l’introduziun dla merscia “local & fair” y criters nüs por la promoziun de produc a chilometer zero.
Implü á la Junta provinziala ince aprové la delibera che reverda le proiet Plus+35 por le sostëgn economich finanziar por l’inserimënt tl monn de laur dles porsones cun handicap. Tres chësc proiet vëgnel metü a desposiziun 16 posć de laur implü co atualmënter. Atualmënter él 161 porsones che é inserides te chësc proiet, conscidran ince i contrac part-time. Le contribut dla Provinzia passa da 1,2 a 1,45 miliuns de euro. Por informaziuns plü avisa sön la modalité da fá domanda prëibel contaté l’Ofize provinzial Porsones cun handicap de via Gamper 1 a Balsan. La tomada dles domandes é ai 28 de forá por renovamënc y assuziuns nöies. Implü él ince ai 31 de ma y ai 20 de setëmber döes tomades de termins por assunziuns nöies. Info: Verena Egger - 0471 418279 - verena.egger@provincia.bz.it.
USP
