Dala Junta: Frabiché sozial, areal feroviar y furnadoies
De plü é stades les dezijiuns dla Junta da incö: dales sauridanzes tl frabiché alisiré por chi che fej volontariat al areal dla ferata y furnadoies nöies.
De plü sauridanzes tres le laur de volontariat por ciafé azes ales abitaziuns dl IPES – chësc é le fin de na deliberaziun aprovada incö dala Junta provinziala che reverda dantadöt families y jogn cina ai 35 agn. La Junta á tut la dezijiun da inciarié l’Istitut por le frabiché sozial IPES da chirí 100 abitaziuns por le proiet “Cun impëgn devers l’abité independënt” te Comuns cun tröpes domandes d’abitaziuns. “Chëstes abitaziuns gnará metüdes a desposiziun de families y de jogn cina ai 35 agn, che laora bele sciöche volontars tl setur cultural y sozial y che se dá da fá por mioré la convivënza soziala, la cualité de vita y por na buna vijinanza”, spliga l’assessur por le frabiché abitatif. L’afit sará chël convenzioné sön basa provinziala a condiziun che les families y i jogn se mëtes a desposiziun por proiec soziai y culturai. Por la creaziun dles listes él l’IPES che colaborëia cun l’Ofize Jonëza dla Provinzia y la Repartiziun Cultura taliana.
Implü á la Junta provinziala ince aprové le plann de atuaziun nü por insediamënc produtifs de interes provinzial denominé Cooperativa Frutticoltori Dodiciville. La cooperativa messará sposté sües ativités dal zënter de Balsan dlungia la staziun dla ferata ala zona produtiva a Balsan Süd. Chësta dezijiun é nezesciara por la realisaziun dl areal dla ferata nü. Implü á la Junta provinziala ince aprové la mudaziun dl plann de atuaziun por la zona de insediamënc produtifs de interes provinzial “Via Einstein sud y via Aeroporto”. La Comisciun natöra, paesaje y svilup dl teritore á bele dé so arat positif tla sentada ai 20 de setëmber dl 2018.
La Junta á ince aprové l’aumënt dl 30 porcënt di contribuc por la costruziun de döes furnadoies nöies tl’Alta Val Venosta. Al reverda da öna na pert 9,3 miliuns de euro por la costruziun de na furnadoia cun cabines por le comprensore dai schi de Schöneben AG. N secundo implant portamunt vëgn sovenzioné dala Provinzia cun 3,7 miliuns de euro che porta dala “Haideralm” ala zona dai schi “Schöneben”.
Na dezijiun importanta é ince stada l’aprovaziun dl plann trienal dl bojëgn formatif 2020 – 2022 por le setur sozial che prevëiga n aumënt de operadus spezialisé dantadöt por les figöres profescionales de operadus sozioassistenziai (OSA) y de operadus soziosaniatrs (OSS) y de educadus dl laur. Indöt se tratel de 1.300 porsones.
USP
