Comité provinzial por la cultura architetonica: Ejëmpl garaté sön Ju
L’ampliamënt dl lüch da paur “Rosshof” sön Ju a San Martin de Tor desmostra sciöche al é poscibl da colié la tradiziun architetonica cun la contrada.
La posiziun dl lüch da paur tradizional “Rosshof” sön Ju ne pita nia ma na beliscima odüda sön le Comun da San Martin de Tor mo porta ince para de plü desifdes porvia che le lüch é posizioné sön n ërt. Dan da püch él ince sté le Comité provinzial por la cultura architetonica y le paesaje che á analisé tratan n suralüch söl post la ghiranza dl proprietar da modernisé y amplié la ciasa. La majun é bele gnüda fata sö danü te na forma tradizionala che se inserësc dër bun tla contrada, insciö l’arat dl Comité. Sciöche ince la majun dess ince la ciasa nöia ester en sintonia cun la contrada inceria por podëi ince pité la formula de “Urlaub auf dem Bauernhof” (vacanzes sön le lüch da paur). Al é preodü da fá sö la ciasa prinzipala impede la ciasa atuala che ne vá nia plü da ressané porvia dla stleta cualité dla sostanza architetonica. Implü dessel ince gní realisé na picia ciasa dlungia tla forma tradizionala. La posiziun sön l’ert dess romagne lascian ince anfat la strada d’azes.
“Les costruziuns dess se adaté ala unizité dla natöra y sides la posiziun dles ciases co ince l’altëza y grandëza dess ester en sintonia cun la contrada inceria”, á dit i rapresentanc dl Comité Sergio Pascolo, Sonja Gasparin y Armando Ruinelli tratan le suralüch. Ai acompagnëia le proiet tl contest dla linia de aconsiamënc dl Comité por la cultura architetonica y le paesaje. Al suralüch ál ince tut pert le vizeombolt Felix Graffonara.
Chësc organ de aconsiamënt é gnü istituí tl 2006 dala Junta provinziala cun l’obietif da promöie na cultura dla sostanza architetonica tl Südtirol y por sensibilisé la sozieté sön chësta tematica. Vigni ënt o porsona interessada pó damané do consëis y arac sides tl setur privat co publich. Domandes pó gní ortiades al secretariat dl Ofize provinzial por la planificaziun Nord – Ost (email ortsplanung.nord-ost@provinz.bz.it).
Por de plü informaziuns: http://www.provinz.bz.it/natur-umwelt/natur-raum/bauen/landesbeirat-fuer-baukultur-und-landschaft.asp
USP
Galaria dales fotografies
