Rondel nü danter San Laurënz y Bornech: convenziun cun le Comun
La Junta á aprové la convenziun por la realisaziun de n rondel nü danter Bornech y San Laurënz. I laurs é gnüs scric fora por na soma de 1,4 miliuns de euro.
Le Comun da San Laurënz laora bele da plü agn por ciafé na soluziun de na regolamentaziun dl trafich sön la strada provinziala 40, chëra che porta dal zënter dl paisc tla direziun dla cité de Bornech. Sön chësta trata él de plü incrujades che porta a zones artejanales cun de conseguënza na gestiun dl trafich complicada. La Junta provinziala á aprové de conseguënza ai 9 de otober na convenziun cun le Comun de San Laurënz por la realisaziun de n rondel nü dlungia l’ativité comerziala dl “Supertip” por na zircolaziun plü asvelta dl trafich y por aumenté la segurëza sön strada.
“Cun le rondel nü sarál poscibl da alisiré i azesc ala trassa prinzipala y ales sortides por les ativités comerziales y otimisé la segurëza”, á dit le diretur dl departimënt, Valentino Pagani. Implü gnarál ince realisé n marciapisc nü che coliëia les ativités comerziales y les architades dles corieres.
La convenziun, che gnará firmada dal assessur por les infrastrotöres y dal ombolt da San Laurënz, definësc dër avisa les condiziuns por la realisaziun dl’infrastrotöra. Le Comun messará se fistidié dla proietaziun, dles esproriaziuns y dla gestiun dles arees nezesciares, la Provinzia á surantut l’inciaria da definí les cosses che mancia. Intratan él gnü scrit fora la gara d’apalt por l’assegnaziun di laurs por la realisaziun dl rondel nü. I laurs nüs metará man d’aisciöda dl 2019.
Le rondel nü ará na lunghëza esterna de 28 metri y na larghëza dla strada de zirca 8 metri. La trassa stradala interessada dal intervënt é 300 metri lungia. L’investimënt preodü por l’opera stradala é de 1,4 miliuns de euro. Le Comun de San Laurënz paiará i cosć por les espropriaziuns y por la proietaziun.
USP
Galaria dales fotografies
