#velessüdtirol18: Plata internet y codejel cun informaziuns d'ütl
Lites provinziales 2018: i zitadins pó s’informé söles lites tres la plata internet, n codejel y n video. Indöt él bele rové adalerch 7.000 usc tres la posta.
Al mancia oramai dër püch ala data dles lites por le Consëi provinzial nü – en domënia ai 21 d’otober pó i zitadins y les zitadines dl Südtirol dé jö süa usc y lité le Consëi provinzial nü. Les informaziuns nezesciares sön les lites é a desposiziun de düc i interessá sön na plata internet aposta lites.provinzia.bz.it. Implü él da püch online ince n video de spligaziun dles lites por todësch y talian, cun titui ince por ladin pro le video todësch che pó gní consulté sön la plata internet ofiziala de facebook dla Provinzia de Balsan. Le video sará ince da odëi tles ferates locales. Da indoman, sabeda ai 13 de otober, sará ince en zircolaziun i codejels de informaziun che gnará injuntá ai foliec prinzipai y ince al foliet edemal ladin.
Bele 7.000 usc dades jö tres la posta
Di indöt 35.003 litadus y litadësses por corespondënza, compedan ince lapró i residënc scric ite al AIRE o deache ai é temporamënter fora dla Provinzia, él bele 7.010 che á dé jö süa usc tres la posta y cun les lëtres che é bele rovades al Ofize Afars istituzionai. Pro les ultimes lites provinziales dl 2013 êl rové adalerch indöt zirca 8.000 usc de 27.911 zitadins che â le dërt de lita tres posta. Les lëtres cun les usc di zitadins che lita tres la posta pó rové adalerch cina en vëndres ai 19 de otober dl 2018.
424.184 zitadins pó jí a lité
I litadus che podará dé jö süa usc pro öna dles sëntes litales dla Provinzia sará indöt 389.181 (situaziun 45 dis dan la lita), tl 2013 ê le numer de 373.050. Sce an cumpëda lapró i litadus por corespondënza spo é le numer complessif de 424.184 zitadines y zitadins en confrunt ai 400.961 dl 2013.
Internet, Facebook y Twitter
Dötes les informaziuns prinzipales por ladin, todësch, talian y inglesc é presëntes sön la plata internet dla Provinzia dedicada aposta ales lites provinziales 2018 sön lites.provinzia.bz.it. Por avëi informaziuns ajuntives él ince atif n account facebook dla Zentrala litala che dá ince respostes a domandes di zitadins. Sön Twitter él gnü chirí fora i hashtag #wahlensüdtirol #elezionialtoadige #velessüdtirol por ciafé atira i resultac.
Informaziuns plü monüdes sot a: lites.provinzia.bz.it
USP
