Les dezijiuns dla Junta provinziala di 16 d‘otober
De plü é stades les dezijiuns dla Junta provinziala: dai contribuc por l’assunziun de porsones cun handicap, al tram de Balsan, l'Alperia y tröp d'ater.
Te süa sentada edemala á la Junta provinziala tut incö ai 16 d’otober la dezijiun da aprové i criters nüs de promoziun por l’assunziun de porsones cun handicap da pert de impreses privates che ne é nia obliades dala lege. La fondamënta iuridica dla deliberaziun é la lege provinziala aprovada tl 2015 sön la “partezipaziun y inclujiun dles porsones cun handicap”. I contribuc nüs pó gní paiá fora a aziëndes privates che ne é nia obliades da tó sö porsones cun handicap o ince che á bele arjunt la cuota mascimala. Ai reverda i daturs de laur che á tut sö, cun contrat subordiné a tëmp determiné o indeterminé, öna o de plü porsones cun handicap y ince titolars d’impresa che á pité n’ocupaziun a colaboradus familiars cun handicap.
N punt important sön l’ordin dl de é ince sté chël da defëne l’aprovaziun dla lege provinziala sön les mosöres de prevenziun y de intervënt por ci che reverda le lu y la laurs dan la Curt costituzionala. Do che le Consëi di Ministri á tut la dezijiun da presenté la chestiun de conformité dla lege da pert costituzionala á la Junta provinziala tut la dezijiun da ne defëne nia ma la validité dla lege, mo dantadöt les competënzes autonomes dla Provinzia de Balsan te chësc setur. La lege provinziala prevëiga che le presidënt dla Provinzia pois adoté mosöres de aplicaziun dla diretiva habitat de prevenziun y intervënt por la gestiun dla presënza dl lu y dla laurs tl teritore provinzial en acordanza cun la normativa europeica y do avëi ciafé n arat da pert dl Istitut superior por la proteziun y la archirida ambientala (ISPRA).
N’atra dezijiun tuta dala Junta provinziala incö é stada l’aprovaziun dl program de costruziun dl Istitut por le frabiché sozial (IPES) dal 2018 al 2020. Al é preodü la costruziun de 129 abitaziuns nöies te 35 comuns desfarënc. L’IPES gestësc dötadöm atualmënter 13.400 abitaziuns cun n afit alisiré. “Chësta dezijiun porta para sauridanzes por families, jënt atempada y porsones singoles, dantadöt por ci che reverda ince la cualité de vita. Les abitaziuns gnará costruides tles zones, te chëres che la domanda é plü alta”, á splighé l’assessur competënt. Chisc comuns é danterater Balsan, Maran, Laives, Lana y Eppan.
La Junta provinziala á ince aprové incö n’acordanza de program danter la Provinzia y le Comun da Balsan por la realisaziun de na linia de tram a Balsan che passará por le zënter dla cité cina l’ospedal rovan ala staziun atuala dles ferates de Sigmundskron. Al sará sëgn la STA che se fistidiará dla proietaziun dl’opera y che ará ince le compit da arjigné ca le plann economich-finanziar y le program di intervënc. Tl setur dla mobilité a la Junta provinziala aprové ince le program d’investimënc dla sozieté inhouse dla STA, olache al é ince preodü n investimënt por le ressanamënt dl garage dles corieres a Corvara.
Implü á la Junta provinziala ince tut la dezijiun da vëne l’8,07 porcënt dles cuotes dla sozieté d’energia Alperia AG ala Selfin AG che é de prorpieté di Comuns dl Südtirol. Chësc vare é ince sté na ghiranza dl Consëi di Comuns por avëi de plü cuotes de proprieté dl’Alperia Ag. La Provinzia ará de conseguënza le 46,38 porcënt dles cuotes dl’Alperia cun la maioranza dles cuotes che ti passa ai Comuns. Löm vërda dala Junta ince al program trienal 2019-21 dl’Istitut Frauenhofer cun 3,7 miliuns de euro por 3 agn por l’archirida scientifica.
Na tematica tratada incö dala Junta é ince stada le spostamënt dla linia dla tenjiun alta danter Marling y Tirol che gnará ciavada ite tla galaria de Segenbühel tl cheder di laurs de realisaziun dla zirconvalaziun nord-ovest. I laurs messess revardé 13,5 km de condüta a destanza dl’energia eletrica y n cincanta stanges dla condüta. I laurs podess gní fac adöm cun i laurs por la realisaziun dla galaria stradala tl cheder di laurs por la zirconvalaziun nord-ovest de Maran. La Junta provinziala che n’á baié tla sentada da incö (ai 16 d’otober) é a öna da ciavé ite la linia d’aria dla tenjiun alta. I laurs che é anfat a chi preodüs por la Val d’Isarch a Millan/Porsenú conzedess da delibré le funz de val de Maran dala linia dla tenjiun alta. La trassa dla linia d’aria interessada é chëra danter l’incrujada de via delle Palade y via Tiefacker a Marling cina a Riffian a nord dl’incrujada da jí a Kuens.
USP
