#velessüdtirol18, apel da jí a lité dl presidënt dla Provinzia
Apel da jí a lité dl presidënt dla Provinzia: jí a lité ai 21 d’otober ó dí renforzé la democrazia.
En domënia ai 21 de otober él düc i südtirolej cun le dërt da lité che pó dé jö süa usc por renové le Consëi provinzial nü. I 35 aconsiadus y aconsiadësses nüs nominará spo dedô danter l’ater ince la Junta provinziala. “Litadësses y litadus – dij le presidënt dla Provinzia de Balsan – podará tó la dezijiun sön chi che ará la poscibilité da surantó responsabilité da manajé nosta Provinzia ti proscims cinch agn”. Por chësta rajun fej le presidënt dla Provinzia n apel ai 424.181 litadus cun le dërt da lité ti damanan da jí a lité y chësc nia ma por eserzité n so dërt, mo ince por renforzé la democrazia.
“La liberté da chirí fora é n sëgn fondamental de na democrazia – dij le presidënt – sciöche la sconanza di dërc dles porsones y dles mendranzes. Tl tëmp passé n’é chisc dërc, che é por nos na cossa naturala, nia tres gnüs tuc söl scerio, y ciamó aldedaincö él miliuns de porsones che tol la dezijiun da ne tó degöna dezijiun canche ara nen vá da lité i rapresentanc politics. Vignun de nos dess indere se tó sö la responsabilité, ince ti confrunc dla sozieté, y dé jö süa usc deache al ne é nia ma n dërt, mo ince n dovëi zivich. Dé jö süa usc ó ince dí tó pert ales dezijiuns che reverda les strategies da atué por le Südtirol dl dagní”.
Ala fin de so apel da jí a lité sotrissëia le presidënt dla Provinzia che “na gran partezipaziun ales lites mostra ince sö la liberté dl pinsier politich de n teritore, renforzëia la sozieté y la cultura democratica y ti dá legitimité ai rapresentanc litá dala sozieté. Chi che ne vá nia a lité ti dá la poscibilité ai atri da tó la dezijiun sön le dagní dl raiun olache al vir. Chi che vá indere a lité anuzëia la poscibilité che ti vëgn conzedüda da tó pert a nosta democrazia.”
USP
