#velessüdtirol18, passa 3 miliuns de vijites sön le portal web
Passa 3 miliuns de vijites, 124mila utënc. Suzes online por le portal web dla Provinzia sön les lites: le 60% di azesc dal fonin.
Al n'é sté degügn problems pro les lites tl Südtirol. Por le pröm iade é les usc gnüdes cumpedades fora de nöt y chësta é stada na novité por döta la mascin organisativa dla Provinzia che á fat n laur ezelënt. I dac sön la cumpëda dles usc é rová adalerch bindebó debota tla Zentrala litala tl Palaz Widmann (gestida dal Ofize Organisaziun), y ince sce les usc é gnüdes cumpedades fora de nöt él gnü registré sön le portal web (www.lites.provinzia.bz.it) numeri da record. Danter i 21 y i 22 d'otober él sté 124.080 utënc che ti á ciaré a indöt 3.199.006 plates. Le plü azesc él sté en domënia püch dan mesanöt, chël ó dí tl momënt plü important, ajache dailó él rové adalerch la majera pert di dac sön le resultat dles lites provinziales; ince tles prömes ores dla doman da en lönesc ti á tröc ciaré ales plates.
Le portal realisé da Informatica Alto Adige en colaboraziun cun l'Ofize Afars istituzionai n'é nia sté peigher gnanca sce al ê tröc azesc. Un di dac plü interessanc che mostra la revoluziun por ci che reverda le comportamënt di utënc sön le web é chël sön i stromënc d'azes al sit. Por le pröm iade bat le smartphone le computer: le 60% di utënc dles plates sön les lites á adoré le fonin, le 31% le computer y le 9% le tablet. Dër tröpa jënt é ince rovada adalerch tla Zëntrala di media arjignada ca dal'Agenzia de stampa y comunicaziun dla Provinzia tl Palaz Widmann, da olache al é gnü metü en ona les trasmisciun dla televijiun, dl radio y di portai web: danter jornalisć y tecnics él sté bëgn 130 operadus di media locai, nazionai y internazionai che á adoré les lercs danter la domënia domisdé y le lönesc sëra.
USP
