Bur tëmp: situaziun d'alarm tl Südtirol, numer vërt por i zitadins
Bur tëmp y problems te döt le Südtirol. Ativada la situaziun d'alarm dala Proteziun zivila, numer vërt cun les informaziuns por i zitadins.
Da incö dadoman dales 10 él pro la sënta dla Proteziun zivila de Balsan la Zentrala operativa provinziala che á le compit da chëie adöm les informaziuns y coordiné i intervënc liá al'ona ezezionala de bur tëmp te döt le Südtirol. Do che al ê gnü metü da en jöbia inant, che an aspetâ che al metess man da plovëi, la situaziun de proteziun zivila da zero a alpha, á la Zentrala operativa tut la dezijiun danmisdé da alzé la situaziun de proteziun zivila sön döt le raiun provinzial al livel cöce (Charlie), che rapresentëia la sitaziun d'alarm, chël ó dí la plü alta. Ala sentada ál tut pert l'assessur provinzial competënt, Arnold Schuler, le Comissar dl govern Vito Cusumano, le diretur dl'Agenzia por la proteziun zivila Rudolf Pollinger, le geologh provinzial Volkmar Mair, le presidënt di stödafüch volontars, Wolfram Gapp, le diretur tecnich de A22, Carlo Costa, y Alberto Regaiolo en rapresentanza de RFI (Rëi dla ferata taliana). Dales 13 él gnü ativé n numer vërt che pita informaziuns d'öga ala jënt (800 751 751), y ajache la situaziun é critica él gnü ativé dötes les strotöres de proteziun zivila. L'apel ala popolaziun é chël da mëte averda a düc i toc de strade, trus da jí cun la roda y infrastrotöres dlungia l’ega, cun lapró i cantiers che é dlungia i rüs.
Al plöi inant, ega alta te Adesc y Riënza
La situaziun ne miorarará nia dan doman. Do n valgönes palses cörtes él preodü aladô dl meteorologh provinzial Dieter Peterlin domisdé y da sëra n peioramënt dl tëmp che portará pro ince a temporai. An s'aspeta che al plöies dassënn, 100 litri por meter cuadrat, cuota superada de cotan tles ultimes ores te tröc raiuns dl Südtirol, sciöche por ejëmpl a Balsan (103), Ladurns, Pennes (190) y Le Sest (200). Implü jarál dassënn da vënt danter 100 y 150 km/h. N’atra cosa olache al é da mëte averda é aladô de Stephan Ghetta dl Ofize idrografich provinzial, les ones d'ega alta de n valgügn rüs: dantadöt por ci che reverda l'Adesc, cun n'ega alta che an s'aspeta por les 6 dadoman a Branzoll, y la Riënza, olache an s'aspeta l'ega alta por les 4 de nöt a Vandoies.
Video Zentrala dla Proteziun zivila
Intervista Günther Walcher (Proteziun zivila)
USP
Galaria dales fotografies
