Kompatscher incunta Juncker, Südtirol é na picia Europa tl’Europa
Arno Kompatscher á incunté incö a Bruxelles le presidënt dla Comisciun europeica, Jean-Claude Juncker.
La situaziun politica t’Europa, cun n’atenziun particolara ales lites dan da püch te Paiern, tl Südtirol y tl Trentin, le conflit söl bilanz dla Talia, les proscimes lites europeiches. Chisc é stá i temesc tratá incö ai 16 de novëmber tl’incuntada a Bruxelles dal presidënt dla Provinzia, Arno Kompatscher, y le presidënt dla Comisciun europeica, Jean-Claude Juncker. Tratan l’incuntada, che á doré n’ora, ê Kompatscher y Juncker stá a öna sön la ghiranza da afronté les gran sfidades globales deboriada, sfidades che passa dal cambiamënt climatich, les migraziuns y la digitalisaziun, “olache l’Europa ais n rode sterch che sais da operé dantadöt tl inters di zitadins”. Juncker y Kompatscher é ince stá a öna sön le fat che les ones atuales de nazionalism “sará la gauja de plü problems co de chi che ai sará bugn da ciafé na soluziun”. Le presidënt südtirolej á sotligné che “propi te chësc momënt messunse, sciöche europeans, sostigní l’Uniun Europeica che sides buna da se presenté te na manira unica respetan les diversités. Le Südtirol laurará inant por renforzé so rode sciöche picia Europa t’Europa, sciöche punt danter les cultures, l’economia y les popolaziuns dla Talia y dles arees todësces, mo por jí inant sön chësc percurs él ince debojëgn dl sostëgn de Bruxelles y de Strasburg”.
Sciöche ejëmpl de na picera Europa t’Europa á Kompatscher elenché l’Euregio Tirol-Südtirol-Trentin, n esperimënt de colaboraziun transfrontaliera “che é stada poscibla dai 70 agn de pesc y de progres t’Europa.” Desvalides é ince les sfidades che passa dala mobilité ai problems dl trafich, y propi te chësc setur él le presidënt südtirolej che á informé Juncker sön i vari fac por ci che reverda la conzesciun dl’autostrada, cun la gestiun dla A22 che dess tosc gní surandada a na sozieté inhouse daldöt publica. Tratan l'incuntada él ince gnü baié dl coliamënt sön scines danter la Val Venosta y le Ciantun di Grijuns cun Juncker che á dit da ester otimist por ci che reverda la colaboraziun danter les Regiuns interessades. Na tematica tratada é ince stada chëra dles politiches alimetares sostenibles, cun n’atenziun particolara ales produziuns bio y a chilometer zero.
Video dl'incuntada danter Juncker y Kompatscher (Fontana: EC - Audiovisual Service)
USP
