Liber y App por cianté deboriada te scora y familia
La publicaziun nöia "Jun a cianté!" dl autur André Comploi é gnüda presentada incö a San Martin de Tor tl Istitut Ladin Micurá de Rü.
Cianté deboriada te scora y familia, promöie la conoscënza di lingac y sostigní l’educaziun musicala y plurilinguala – chisc é danterater i fins prinzipai dla publicaziun nöia “Jun a cianté!” de André Comploi, capostampa dla Wiener Staatsoper, realisada adöm al Istitut Ladin Micurá de Rü. Al se trata de n pice liber cun 25 cianties por mituns te cater lingac: por ladin, todësch, talian y inglesc. Les cianties n’é nia ma scrites y publicades te n liber, mo ares é ince gnüdes tutes sö te vigni lingaz: indöt 101 cianties („Berba Iaco“ é ince por franzesc) stampades y registrades da n grup de stromentalisć dal vi y ciantades da na möta o n möt dal vi.
La presentaziun dl liber nü é gnüda a se le dé incö ai 17 de novëmber tla sënta dl Istitut Ladin Micurá de Rü a San Martin de Tor.
"An ne pó nia i dé pëis assá al'importanza dl cianté cun mituns, che dëida pro a so svilup emozional, sozial y inteletual - sciöche de plü stüdi scientifichs á desmostré. Y le plü adora ch'an se dá jö cun de plü lingac, le plü saurí se féjun plü tert", dij l’autur André Comploi che spliga inant: "Implü arati che la publicaziun pois ince gní aratada simbolicamënter sciöche n punt danter cultures, danter lingac y grups linguistichs. Düc trëi i lingac ofiziai dla provinzia é rapresentá, implü l'inglesc sciöche lingaz de intenüda internazionala - ai é liá adöm y mantëgn tl medemo tëmp so valur autonom." Ince le diretur dl Istitut Ladin, Leander Moroder, sotlignëia l’importanza “de n proiet unich por la realté ladina. Al se trata de n proiet multimedial y te cater lingac che sará de gran valüta sides por les valades ladines, mo ince aldinfora”. La poscibilité da podëi lí i tesć, ti ciaré ai dessëgns y ascuté les registraziuns tres la app fej aldinfora de chësta publicaziun multimediala n ejëmpl dër garaté de combinaziun danter musica, cultura y plurilinguism, insciö Moroder.
„Jun a cianté!“ (le titul é tut dala ciantia „Cucu, cucu“) atoca n punt important dla formaziun y educaziun d’aldedaincö: la promoziun dl cianté cun mituns y dl plurilinguism tl medemo tëmp. I mesi é classics y moderns: da öna na pert n liber stampé y registraziuns cun sonns tuc sö dal vi y nia computerisá, dal’atra pert na app y la poscibilité da ascuté les registraziuns diretamënter tres n codesc QR.
Les cianties tutes ite é por la gran pert tradizionales, ares á suravit deplü dezens y é tres ciamó atuales. N gran numer é tutes dal cërtl cultural de lingaz todësch, les atres da chël de lingaz inglesc, talian o franzesc. Öna sora è originala ladina („Pesc dla sëra“). Ma dër püces ê bele da ciafé te deplü lingac – la maiú pert dles traduziuns ti atri lingac y dötes les verjiuns ladines é gnüdes fates da André Comploi.
N valur spezial i dá ala publicaziun les ilustraziuns de Matteo Rubatscher, che n’é nia ma decoraziun, mo é pert integrala. Les interpretaziuns dessignades y depëntes a man de düc i 25 toc dëida da trasmëte te na manira plajora le contignü y descür n gröm de details y comentars filigrans ince por i adulc – y alisirëia le cianté cun mituns. Pici y gragn incuntará val’ de conesciü, descuriará val’ de nü – y sintiará dantadöt ligrëza.
Le liber nü pó gní cumpré tles sëntes dl Istitut Ladin a San Martin y a Sëlva y costa 18 euro. Le liber pó ince gní comané online sot a www.micura.it. Implü él ince da ciafé tles majeres botëghes di libri dl Südtirol.
USP
Galaria dales fotografies
