Lovines, boletins por döta l’Euregio
Al é gnü presenté incö le proiet de colaboraziun tl’Euregio che prevëiga boletins suraregionai dl pericul de lovines en presënza de Kompatscher, Platter y Fugat
Boletins y previjiuns suraregionales dles lovines tres ajornades sön döt le teritore dl’Euregio sará tosc a desposiziun debann por düc i schi-alpinisć y i apascioná da jí sö por munt tratan l’invern sön la plata internet www.valanghe.report. Al se trata de n proiet te trëi lingac por todësch, talian y inglesc che é nasciü tres n fonds europeich Interreg Talia-Austria y realisé en colaboraziun cun le GECT y l’Istitut de Geografica y de archirida regionala dl’Université de Viena. Incö ai 19 de novëmber é la plata internet nöia gnüda presentada a Balsan tl contest de na conferënza stampa en presënza di trëi presidënc dl’Euregio Arno Kompatscher por le Südtirol, Günther Platter por le Tirol y Maurizio Fugatti por le Trentin, che por le pröm iade s’á incunté ofizialmënter. “Cun chësc proiet inovatif nasc por le pröm iade al monn n boletin cun previjiuns dles lovines sura i confins fora”, á comenté contënt Kompatscher. L’obietif dl proiet é chël da garantí la segurëza plü alta por i schi-alpinisć y por i apascioná da jí sö por munt tratan l’invern, ince en conscidraziun dl aumënt dles ativités alaleria danter la popolaziun. Aladô di dac él passa 10 miliuns de turisć che vá cun i schi a livel dl’Euregio, de chisc 700.000 che fej schialpinism. “Ma tla sajiun da d’invern dl ann passé él sté 2,5 miliuns de vijites söi portai regionai dl sorvisc lovines dl’Euregio”, á dit Kompatscher.
Informaziuns al sorvisc dla popolaziun
Sön la plata internet nöia sarál da ciafé boletins ajorná regolarmënter por döt le raiun dl’Euregio cun chertes che mostra la condiziun dla nëi, la profondité dla cuantité de nëi te seturs desvalis, la temperatöra dl’aria y la direziun di vënc. Chësc á splighé incö i suranstanc di sorvisc provinziai de previjiun dles lovines Rudi Mair (Tirol), Michela Munari (Südtirol) y Alberto Trenti (Trentin). I esperc de lovines dles regiuns metará a desposiziun tres n sistem informatich automatisé de plü dac che vëgn da analises fates dal sorvisc meteo dles trëi regiuns, dales previjiuns dl tëmp y dales prezipitaziuns, dales carateristiches dla nëi y dles lovines che gnará a se le dé tl teritore interessé. Le proiet é gnü coordiné da Christoph Mitterer y da Norbert Lanzanasto dl sorvisc lovines dl Tirol y da Alex Boninsegna por l'Université da Balsan, cun l’obietif da mëte tla rëi i trëi sorvisc de previjiun dles lovines dles trëi Regiuns dl’Euregio. Al é ince gnü ponsé ala defujiun por i social media y por les televijiuns. Ince la consultaziun dla plata internet é gnüda planificada a na moda da ti alisiré al anuzadú la chirida dles informaziuns d’ütl. I dac vëgn metüs a desposiziun debann sön Lawinen.report, Valanghe.report, Avalanche.report y chësc proiet fej insciö ince pert dla scomenciadia Open Data dles trëi Regiuns.
Audio y video
Imajes presentaziun dl proiet nü
Imajes plata internet „Albina“
Intervista Rudi Mair - suranstant dl sorvisc dles lovines dl Tirol
Intervista Michela Munari - suranstanta dl sorvisc dles lovines dl Südtirol
Intervista Alberto Trenti – suranstant dl sorvisc dles lovines dl Trentin
Intervista Christoph Mitterer – coordinadú dl proiet
Audio (talian) Kompatscher - Fugatti - Mitterer - Munari - Trenti
Audio (todësch) Kompatscher – Platter – Mair – Munari
USP
Galaria dales fotografies
