Manutenziun dles rovines de Ciastel de Val a Sëlva
Les rovines dl Ciastel de Val, de proprieté provinziala, dess gní ressanades. Chësta é stada na dezijiun dla Junta provinziala.
Le Ciastel de Val é posizioné a 1.600 metri de altëza sön na parëi dl Mont Stevia al entrada dla Val longia te Gherdëna. Ma na picera pert dl Ciastel é ciamó da odëi y les condiziuns de chëstes rovines ne é nia bunes. La rovina é de proprieté dl’Agenzia Demane dla Provinzia. La Junta provinziala á aprové sön proposta di assessurs Florian Mussner (bëgns culturai) y Christian Tommasini (patrimone) da atué intervënc de manutenziun y de ressanamënt.
“Al é gnü araté che la soma d’investimënt por fá i laurs plü de prescia é de 250.000 euro”, á dit Mussner y Tommasini. Por efetué i laurs dess le proiet gní inserí tl program de manutenziun dl frabiché dl Ofize Manutenziun frabicac dla Provinzia. Le Ciastel de Val ê gnü costruí tl 13ejimo secul y spo gnü fat sö danü tl ann 1525.
USP
