De dla cooperaziun al svilup, convëgn al’Eurac
La tematica prinzipala dla De dla cooperaziun al svilup é stada inann le comerz iüst y solidal.
Esportaziuns aumentades dl 50 porcënt dal 2011 cina aldedaincö, passan dai 35 sozi a na rëi de 1800 colaboradus rovan a sis morins nüs costruis söl post por la trasformaziun dla ciana te zücher Mascobado venü spo tles botëghes dl Comerz iüst y solidal. Chisc é i resultac dla colaboraziun tl setur, scomenciada dan da 30 agn, danter la Provinzia de Balsan y la cooperativa Panay Fair Trade Center tles Filipines. La storia de chësta esperiënza de suzes, adöm ince a chëra dles cooperatives Manduvirà tl Paraguay – cun 2.000 sozi che laora ince tl setur dla produziun dl zücher Dulcita – y Corporap – Cooperativa de Productores de Panela de El Paraiso dl Ecuador – cun incö 5.000 produturs scomencian da 45 lauranc – é stades la tematica prinzipala dl De dla cooperaziun inier ai 28 de novëmber al’Eurac a Balsan. De plü esperc dl setur á rajoné dla tematica adöm al assessur provinzial Richard Theiner jon ite tl detai dles tematiches de n’ecnomia alternativa, dles prospetives dl setur dla cooperaziun al svilup y dles alternatives locales. I rapresentanc dles trëi cooperatives PFTC, Manduvirà y Corporap á invié te n messaje video i rengranziamënc por le sostëgn ai proiec. Dantadöt de valüta é ince stada la testemonianza rovada dales Filipines, olache al vëgn ciamó inrescí por ciafé i responsabli dl omizide de Romeo Romy Capala, le diretur da denant y presidënt de PFTC, copé ai 15 de merz dl 2014 tla sënta dla cooperativa. Süa figöra, adöm a d’atres porsones vitimes de violënza, é n simbol de resistënza te n Paisc olache al vëgn stimé che le 70 porcënt di terac é tles mans dl 1 porcënt dles families filipines.
Na storia lungia de cooperaziun
La Provinzia de Balsan é la patria dles prömes botëghes dl Comerz iüst y solidal talian cun i pröms punc de venüda che á daurí ti agn 1980. Mo la tradiziun vá inant cina aldedaincö: tl 2018 á l’Ofize Afars de cabinet dla Presidënza aprové n plann da 2 miliuns de euro por finanzié 53 proiec te 27 Paisc dl monn. De setëmber dl 2017 á la Provinzia de Balsan ince ciafé le reconescimënt de “Provinzia solidala” dala World Fair Trade Organisation. “Les stories de suzes sciöche Panay Fair Trade Center, Manduvirà y Copropap é ma trëi ejëmpli de sciöche na strategia de dorada lungia a livel global portes a de mius condiziuns de vita por chi che laora te chisc seturs, mo ince a n consum plü iüst y sann por la popolaziun locala”, á dit l’assessur Theiner. Düc i proiec sostignis dala Provinzia tl contest de World Fair Trade Organisation á sciöche fondamënta i diesc prinzips dl comerz iüst: creaziun de oportunités por produturs svantajá, trasparënza y afidabilité dl’adoranza dles ressurses, pratiches de n comerz iüst, paiamënc iüsć por i lauranc, proibiziun dl laur de mëndri, avalianza de jëne, de bunes condiziuns de laur, aumënt dles competënzes, promoziun dl comerz iüst y respet por l’ambiënt. Ala conferënza ál ince tut pert le presidënt dla Wolrd Fair Trade Organisation, Rudi Dalvai.
USP
Galaria dales fotografies
