Dala Junta: les dezijiuns plü importantes
Deplü é stades les dezijiuns dla Junta provinziala incö: dales ponsiuns d’invalidité, al sostëgn dles piceres impreses cina al diretur dles scores de musiga.
La Junta provinziala á tut la dezijiun incö, ai 4 de dezëmber, da alzé dal 1 de jená inant le tët d’eté plü alt da 66 agn y 7 mëisc cina a 67 agn por ci che reverda le paiamënt dla ponsiun de invalidité zivila. Chësta dezijiun se basëia sön les indicaziuns dla zircolara dla Direziun zentrala dl INPS. Do da chësta eté ne gnarál nia plü paié fora la ponsiun d’invalidité da pert dla Provinzia mo la porsona podará damané al INPS l’erogaziun dl assëgn sozial de sostituziun dla ponsiun. Atualmënter é la ponsiun de invalidité zivila de indöt 438,08 euro al mëis y al vëgn paié fora tl Südtirol dötaurela 4.900 ponsiuns de invalidité zivila por 28.957,972 euro. L’investimënt implü sará de 220.000 euro.
Na dezijiun tuta dala Junta incö é ince stada chëra da aprové n finanziamënt por la capitalisaziun de piceres impreses inovatives che sará dui iadi tan co denant. Al se trata de contribuc de n iade su dl valur da 40.000 cina 200.000 euro. Indöt él gnü scrit fora tl 2018 na bandida por na soma de un n miliun y mez de euro por sostigní l’insediamënt de piceres impreses inovatives tla Provinzia de Balsan. Dötadöm é la soma d’investimënt dal 2013 inant de 2,3 miliuns de euro por 13 impreses inovatives che á superé la seleziun danter 47 che á fat domanda. Vigni candidatöra mëss presenté n business plann de trëi agn cun n cronoprogram che prevëiga la contlujiun de cater traverc. Ma sce al vëgn arjunt chisc traverc vëgnel paié fora le finanziamënt por la fasa ajuntiva. Les domandes por tó pert ala bandida de cuncurs pó gní dades jö cina ai 28 de forá pro l’Ofize Inovaziun y tecnologia.
Implü á la Junta provinziala aprové le proiet de abitaziuns de transiziuns por le sorvisc Ciasa dles ëres che sará sostignará les ëres y sü mituns do na perioda tles strotöres de proteziun. La perioda de transiziun pó ester de 18 mëisc y pó gní ampliada por atri 6 mëisc. “L’obietif prinzipal é chël da ti pité ales ëres te na situaziun de dificolté y violënza na strotöra de acoliënza por jí tl vers de plü autonomia te n contest de acompagnamënt”, á dit l’assessuria Martha Stocker. Al podará s’anuzé dles abitaziuns de transiziuns ëres cun o zënza mituns, residëntes tla Provinzia de Balsan che é gnüdes tutes sö te na strotöra de proteziun dl sorvisc Ciasa dles ëres y che fej pert de n proiet de sortida da situaziuns de violënza por rové a na vita autonoma. Le proiet é gnü elaboré da n grup de laur cun de plü rapresentanc di sorvisc soziai, di ënc privac, di gesturs publics dles strotöres y dal Comun de Balsan y coordiné dal Ofize por la sconanza di mëndri y dl’inclujiun soziala.
Sön proposta dl assessur Philipp Achammer á la Junta provinziala ince chirí fora de diretur nü dles scores de musiga todësces y ladines, al se trata de Felix Resch. La Junta á chirí fora da na terna de 3 candidac che é gnüs stabilis da na comisciun d’ejame tres n concurs de seleziun. Felix Resch á 61 agn y é atualmënter componist, diretur de chor y diretur da denant dl Conservatore de Musiga “Monteverdi” de Balsan. “Cun Resch ciafun n diretur competënt che á na buna rëi de colaboraziun tla Provinzia y aldinfora y che podará dessigü dé azënc nüs por ci che reverda l’insegnamënt de musiga”, á dit Achammer. Atualmënter él scric ite indöt 16.800 mituns y scolars tles 2 direziuns de musiga ladines y tles 15 scores de musiga todësces.
La Junta á ince aprové incö na conveziun cun le Ministere por les Infrastrotöres y le Trasport por amplié la rëi de fossenares eletriches por veicui eletrics. Indöt gnarál investí 774.000 euro por costruí 21 fossenares publiches nöies pro chëres bele presëntes che é atualmënter 75. Le Ministere, tres la convenziun, metará a desposiziun 257.000 euro.
USP
