Dala Junta: les dezijuns plü importantes
La Junta provinziala á tut incö de plü dezijiuns che reverda l’Acordanza de Milan, la mobilité sostenibla, les üties da munt y le zënter dl comerz “Walthepark”.
La Junta provinziala á tut la dezijiun incö danmisdé ai 11 de dezëmber da impegné indöt 100 miliuns de euro preodüs dal’Acordanza da Milan por daidé para al ressanamënt dla finanza publica. Sciöche preodü dal’acordanza dl 2010 él la Provinzia che surantol le paiamënt de n valgönes deleghes, funziuns y sorvisc dl Stat tl Südtirol y al finanziamënt de scomenciadies di Comuns confinanc. Di 100 miliuns jará indöt 40 miliuns a bëgn de proiec presentá da Comuns de confin dl Venet y dla Lombardia. D’atri 5 miliuns é preodüs por i paiamënc dl personal y di cosć dl funzionamënt dl Conservatore “Monteverdi” de Balsan y ciamó 2,5 miliuns por l’assunziun dl contribut statal di cosć de funzionamënt dl’Université Lëdia de Balsan y 1,3 miliuns por les funziuns che reverda le Tribunal regional dla iustizia aministrativa TAR. Por ci che reverda sides la RAI co les Postes él bele gnü tut sö impëgns de paiamënt damperfora.
Döes d’atres dezijiuns dla Junta provinziala reverda les prozedöres y les straufunghes aministratives da apliché ti caji de mancianza dl’oblianza de variora sides por l’ann scolastich 2018/19 che ince 2019/20. La pröma deliberaziun stabilësc la prozedöra da tigní ite por l’ann atual y prevëiga che i geniturs (o chi che á la responsabilité di mëndri) vëgnes damaná da ademplí le bojëgn dles variores de oblianza por i mituns da pert dl Sorvisc dl’Aziënda sanitara. Te n secundo momënt gnará i geniturs inviá a na incuntada cun la poscibilité da fá les variores, le terzo punt sará spo n verbal de contestaziun dla straufunga aministrativa de 167 euro cun na perioda de 60 dis da fá les variores. I geniturs che ne paia nia la straufunga y ne fej nia les variores ai mituns gnará segnalá dal’Aziënda sanitara al Ofize provinzial Prevenziun y promoziun dla sanité publica che ti menará ai genitrus n’ordinanza de paiamënt. Implü gnará i mituns segnalá ales strotöres scolastiches interessades. Por l’ann scolastich 2018/19 tratan la fasa de prozedöra é i mëndri conscidrá prenotá por la variora y porchël é i mituns dötaurela te na posiziun iuridica che ti pormët da frecuenté les strotöres scolastiches. Por l’ann scolastich 2019/20 gnarál apliché les desposiziuns statales.
La Junta provinziala á tut la dezijiun da fá para al proiet europeich LIFE che á sciöche obietif da amplié l’adoranza cina le 2025 de veicui y auti a emisciuns zero. “I orun cherié na rëi de infrastrotröres sön döt le teritore por fá a na manira che i mesi eletrics y a idrogen ais na infrastrotöra de referimënt por la manutenziun y le refornimënt de eletrizité o idrogen. A chësta manira dessel gní aumenté le numer de veicui a emisciuns zero te nosta provinzia”, sotlignëia le presidënt dla Provinzia Arno Kompatscher. Por le vizepresidënt Richard Theiner é la partezipaziun al proeit LIFE n vare inant por arjunje l'obietif dl pachet clima che reverda le smendrimënt de dui terzi dl anidride carbonica cina le 2050. Ince l’assessur por la mobilité Florian Mussner á recordé che le sostëgn dla mobilité sostenibla fej pert de na strategia plü ampla dla Provinzia y che á süa fondamënta sön i prinzips da evité, da trasferí y da mioré le trafich esistënt tres n pachet de mosöres. La Provinzia fej insciö para ince ai proiec europeics CHIC y JIVE cun la cumpra de corieres a idrogen y l’istalaziun de na rëi de fossenares eletriches. La proiet LIFE prevëiga l’ampliamënt di veicui a emisciuns zero sides por ci che reverda le trafich privat che chël publich. Al dess gní istalé 33 fossenares nöies por veicui eletrics y 5 fossenares a idrogen tl Südtirol. Le proiet vëgn metü en pratica por merit dla colaboraziun dl’Uniun Europeica, dl’Alperia, dl COnsorz energetich Val Vensta, dl’aziënda Stadtwerke Bornech, dla STA, dl’EURAC, dl A22 y dla SASA. L’investimënt por le proiet é de 22,6 miliuns de euro: 7,9 miliuns vëgn da fonds europeics, 7 dala Provinzia de Balsan y 7,8 vëgn partis sö söi partners.
Implü á la Junta provinziala ince aprové le proiet por le zënter de comerz nü Waltherpark de Balsan che é gnü presenté dala sozieté ICM Italia General Contrator. L’aprovaziun dla Junta é gnüda tuta aladô dles condiziuns dl Comité por l’ambiënt che á dé so arat positif. Danterater él condiziuns che reverda la sconanza dl rü Isarch y dla fauna y dles ressurses idriches. Implü él preodü mosöres de compensaziun por i biotops y le rü Isarch. Surapró dessel gní mantigní i lëgns tl parch dla staziun o sentá danü sce an ess da mëssei nen tó demez un tratan i laurs. Al dess gní garantí la poscibilité da adoré la roda da se möie te chësta zona dla cité. La Junta á ince dé löm vërda por le program de ressanamënt dles üties da munt dla Provinzia rovan dötadöm a 15,3 miliuns de euro por le 2019. Tratan la sentada él ince gnü aprové la deliberaziun da scrí fora les conzesciuns por la gestiun dles üties da munt “Schwarzenstein” y “Flaggerscharte”.
USP
