Te na rëi por rové a de plü integraziun
Le raport sön l’imigraziun y sön l’integraziun cun dac, zifres y proiec é gnü presenté incö (ai 13 de dezëmber) a Balsan.
Regoles tleres, integraziun söl post y laur tres na rëi é les fondamëntes dla politica dl’integraziun tl Südtirol, á sotrissé l’assessur provinzial Philipp Achammer tratan la presentaziun dl raport di agn 2016 y 2017 sön l’imigraziun y l’integraziun tl Südtirol. Adöm a Janah Maria Andreis dl sorvisc de coordinaziun dl’integraziun, le diretur Stephan Ortner y Roberta Medda dl Istitut por i dërc dles mendranzes dl’Eurac él gnü presenté incö les zifres y i proiec concrec. “Nosc obietif é chël da presenté zifres y dac te na situaziun sciöche chëra atuala, olache la tematica dl’imigraziun vëgn odüda te na manira scetica”, á dit Achammer. L’integraziun mët man pro vignun de nos, sides por ci che reverda les porsones rovades adalerch dan da püch, co ince la popolaziun locala. Important él da avëi, dlungia regoles tleres, ince n model de suzes che desmostres sciöche al pó funzioné. Porchël él la Provinzia che á sostigní l’ann passé indöt 21 proiec por n investimënt de 300.000 euro, dantadöt ti Comuns. Implü él gnü a se le dé colaboraziuns cun privac y aziëndes.
N ejëmpl pratich é gnü presenté incö dal imprenditur da Balsan, Heiner Oberrauch, che á rajoné dl proiet “OrtoSalewGarten”, olache la la firma á metü a desposiziun na pert de terac por fá n urt y senté ite n valgönes verzöres. “I á odü sciöche la mancianza de prospetives pó porté a situaziuns de depresciun pro jënt motivada y che á vëia da fá. I á spo ponsé: chiló mëssi fá val”, á dit Oberrauch. Les esperiënzes é stades scialdi positives, porchël jará le proiet inant ince le proscim ann.
Robert Medda dl’Eurac á spo presenté n valgügn dac; na pert de chisc dac é bele gnüs presentá tratan la discusciun dl raport anual sön l’imigraziun. Por ci che reverda les spëises tl setur spzial él da conscidré che la pert por i foresti é jüda zoruch dal 15,3 porcënt (2016) al 8,7 porcënt dl 2017. Ince pro les abitaziuns dl IPES él da registré n dat che vá zoruch. N dat che é ince gnü presenté é che plü co le mez porcënt di foresti che vir tl Südtirol á sciöche religiun na confesciun dl cristianesim. Mo n terzo di foresti é de fede musulmana.
N tema che le raport trata é ince le laur di ofizi provinziai por ci che reverda le laur de integraziun, ince tres cooperaziuns y proiec. “Lauré te na rëi é fondamental sön düc i liví d’integraziun”, á dit Janah Maria Andreis dl sorvisc de integraziun dla Provinzia. L’assessur Achammer á confermé che le laur de integraziun reverda düc i seturs dla vita publica, “ma insciö él poscibl da cherié prospetives por le dagní y regoles tleres por düc. Ma sce les condiziuns sön l’integraziun é tleres sarunse bugn da afronté les desfides locales y internazionales te na manira adatada”, insciö Achammer.
USP
