Tru lëde por la formaziun nöia dl personal insegnant d’integraziun
Tl semester da d’invern 2019/20 pëiel ia le pröm curs universitar, svilupé por le Südtirol, por personal insegnant d’integraziun dles scores mesanes y altes.
Tles scores dl Südtirol él tres n majer bojëgn de personal insegnant d’integraziun spezialisé. Dantadöt tles scores mesanes y altes mancel insegnanc y insegnantes d’integraziun cun na cualificaziun. Aladô dl regolamënt statal arjunjon la formaziun tres n stüde, l’abilitaziun da insigné y spo dedô la spezialisaziun. Mo insciö ne vára nia plü da ti rové do ala domanda. “Chësc svilup s’á sforzé da tó n ater tru” spliga l’ assessur por l’istruziun Philipp Achammer. Insciö él gnü cherié dl 2016 cun lege provinziala la poscibilité por le Südtirol da istituí cursc de formaziun aposta, tan inant che al vëgn formé massa püch personal insegnant tres le tru dé dant dal stat. “Sön chësta basa él gnü lauré fora dala Direziun Istruziun y Formaziun todëscia y dal’Intendënza ladina en colaboraziun cun l’Université Lëdia de Balsan y la plataforma universitara impromó fondada Formaziun y Imparé por la vita n conzet formatif spezifich por personal insegnant d’integraziun anuzan insciö por le pröm iade la lerch de realisaziun nöia” spliga l’assessur por l’istruziun. Al alza ince fora che chësta regolamentaziun nöia reverda ma les scores ladines y todësces y l’abilitaziun da insigné por integraziun vel ma por le Südtirol. „La formaziun nöia por le personal insegnant d‘integraziun é na chestiun fondamentala de gran valüta, nia ma deache al é poscibl da corespogn ai bojëgns di mituns cun dificoltés, mo ince por ti jí adincuntra ales esigënzes speziales dles families”, á dit l’assessur provinzial Florian Mussner. Personal insegnant spezialisé aposta é n arichimënt por döt le sistem scolastich, insciö Mussner.
Formaziun dlungia la pratica y locala
Tla pröma pert dl curs universitar nü dessel gní formé 80 insegnanc y insegnantes d’integraziun por les scores mesanes y ales todësces y cinch por chëres ladines. „ MO deache le bojëgn é ciamó cotan plü gran y i adorun almanco ciamó tan de insegnanc y insegnantes d’integraziun unse intenziun da mëte ciamó tosc a jí na te’spezialisaziun“ anunziëia l’assessur Achammer „ che tol magari ince ite tl dagní la scora elementara.“
Pro chësta formaziun aprovada incö dala Junta provinziala ti vëgnel dé na gran importanza al orientamënt ala pratica: le curs al’université vëgn tigní sciöche acompagnamënt profescional y é lié dassënn al laur pratich de insegnant/insegnanta d’integraziun. Chësc vëgn garantí tres contrac de formaziun resservá al personal insegnant che fej chësc stüde y che vëgn dá fora cun preferënza tl cheder dla lîta di posć d’insegnamënt. Le curs de formaziun tol ite trëi modui cun indöt 120 ECTS, la dorada dl curs de spezialisaziun s‘orientëia ales condiziuns d’azes de che che tol pert y pó ester de alplü trëi agn. Do che le personal insegnant d’integraziun á stlüt jö le curs cun suzes pól s’aspeté n contrat de laur a tëmp indeterminé. Le curs de formaziun costa danter 400 y 2400 euro, aladô dles condiziuns d’azes che an á.
Ince d’atri ti pó pormez
Cun na prozedöra de cerna él poscibl da ti rové pormez ai posć de stüde y ai contrac de formaziun. A chësta pol tó pert personal insegnant cun abilitaziun da insigné o che á l’azes a classes de concurs o organigrams che é bele. Implü él ince d’atri che ti pó pormez: porsones interessades cun n stüde universitar de almanco cater agn fat o reconesciü tla Talia pó s‘anunzié pro la prozedöra de cerna. Chësc vel ince por porsones cun n bachelor fat o reconesciü tla Talia te pedagogia o te materies dlungia la pedagogia sciöche pedagogia soziala, laur sozial, psicologia, ergoterapia o logopedia.
La prozedöra de cerna vëgn scrita fora de jená
Do che la Junta provinziala á istituí le curs cun la deliberaziun da incö scriará fora la Direziun Istruziun y Formaziun todëscia y l’Intendënza ladina amez jená dl 2019 les döes prozedöres de cerna cun n termo dla domanda de 30 dis. La prozedöra de cerna por i posć de stüde y i contrac formatifs scomenciará bonamënter de merz y messess ester stlüta jö cuntra la fin d’aurí. Amez ma dessel spo gní surandé i posć por i contrac formatifs.
Informaziuns che gnará tresfora atualisades é da ciafé sön les plates internet dla Direziun Istruziun y Formaziun todëscia www.provinz.bz.it/bildung-sprache/didaktik-beratung/inklusion.asp y dla scora ladina www.provinz.bz.it/intendenza-ladina
USP
