Scribo: Cater pesć per l’operes plu garatedes dl cuncors leterer
I miëur lëures pra l cuncors leterer Scribo ie de Nadia Rungger y Bruno Maruca pra la categuria junior y de Ivan Senoner y Rut Bernardi pra la categoria senior.
24 ie la operes letereres dates ju per l cuncors leterer "Scribo" dla Repartizion Cultura y Ntendënza ladina dla Provinzia. I miëur lëures dla categuria junior ie de Nadia Rungger y Bruno Maruca, tla categuria senior à la giuria premià i lëures de Ivan Senoner y Rut Bernardi. “La leteratura ladina ie viva y crësc y chësc ie n bon sëni. Scumenciadives sciche chëstes ie de utl per motivé autores a scrì per ladin y nce per motivé la populazion a liejer per ladin”, spliega l assessëur per la scola y cultura ladina Florian Mussner. Chësc cuncors ie de segur na mutivazion mplu per scrì te nosta rujeneda dl’oma, nsci l assessëur Mussner.
Pra la cuarta edizion dl cuncors leterer iel unì mandà ite de ndut 24 lëures: 15 operes per la sezion junior y nuef operes per la sezion senior. La giuria metuda adum da Ingrid Runggaldier (presidënta), Erika Castlunger, Cristina De Grandi, Elisabeth Kostner y Theodor Rifesser à auzà ora dantaldut la bona cualità dl’operes. Pra la valutazion iel unì tëut n cunsciderazion l lingaz, l cuntenut y l’uriginalità n generel n cont de cuntenut, lingaz y strutura.
Pra la categuria junior ie la cumiscion unida a una de ti dé l prim pest al’opera "Bon viac" de Nadia Rungger per la valuta artistica, l’uriginalità dl test, dl cuntenut, dl stil y dl lingaz de chësc lëur. ”Bon viac ie n test dut ntëur uriginel sibe a livel de cuntenut che a livel dla forma. Uriginei ie per ejëmpl i juesc de paroles y la tecnica de straiché ora frases. I pensieres ie soc y l lingaz modern, la storia ie poetica y romantica y la cualità artistica dl lëur auta. L se trata de n’opera ironica y bën strutureda che lascia lerch a de plu nterpretazions”, nsci la giuria.
L segondo pest ti à la giuria dat al’opera "New York ne ie mei stata tan ueta" de Bruno Maruca. L lëur toca la cumiscion per la maniera vijuela cun chëla che l ie scrit. L test ie frësch y dinamich, l ladin ie naturel, l ie l ladin da uni di dla generazion di jëuni. La storia ie scrita coche l “plot” de n film y si ritm asvelt fej la cuntia plajëula da liejer. La trata tematiches scialdi sentides dala junëza sciche la droga, l sulentum, l vester stluc ora, l ne unì nia ntendui dai genitores che se pierd sun la streda dla vita.
Pra la categuria senior à la giuria cris ora per l prim pest l lëur "L testamënt dl lëuf" de Ivan Senoner. La ie la miëura opera dal pont de ududa artistich: l’idea ie bona y nce l fil condutëur ie for tler. L autor se muev danter poejies, enigmes, fanatajia y crimi. La maniera de coche la storia ie cunteda dà la sensazion de unì trac ite te chël che suzed, de viver pea la ntraunides, de vester leprò. La cuntia ie vijuela, frëscia y nce da rì y curespuend de plën ala carateristiches che l genre “fantasy” se damanda. L lingaz adurvà ie l ladin atuel di jëuni, scialdi autentich y da vivanda.
L segondo pest dla categuria senior ti vën dat a Rut Bernardi per l’opera "Vites scutedes via. Essays letereres". Chësta culezion de 5 biografies basedes sun la realtà ma elaburedes cun elemënc fitifs ie de valuta dantaldut pervia de si cuntenut y nteres storich. L’autora ie stata bona de purté a lum na gran lingia de detai che à caraterisà la vites dla persunaliteies descrites y la ti à nsci dat forma y vivanda. La ncrujeda danter elemënc realistics y fantastics ie organica y l lingaz prezis y curà.
L’operes numinedes dessëura unirà publichedes. Plu avisa uniral dat ora trëi publicazions: L testamënt dl lëuf de Ivan Senoner, Vites scutedes via. Essays letereres de Rut Bernardi y na culezion de stories.
Chisc ie i lëures che à venciù:
Sezion junior (danter i 16 y i 25 ani)
1. Nadia Rungger Bon Viac (3.000,00 €)
2. Bruno Maruca New York ne ie mei stata tan ueta (2.000,00 €)
Sezion senior (> 25 ani )
1. Ivan Senoner L testamënt dl lëuf (3.000,00 €)
2. Rut Bernardi Vites scutedes via. Essays letereres. (2.000,00 €)
USP
