Ejams de Stat tla scora alta: Les materies dla secunda proa scrita
Le Departimënt Educaziun y Cultura Ladina á publiché incö les materies di Ejams de Stat dles scores altes ladines che reverda la secunda proa scrita.
Le MIUR (Ministero Istruzione Università e Ricerca) á publiché ai 18 de jená dl 2019 les materies dla secunda proa scrita dl Ejam de Stat 2018-19 y les materies che ti vëgn assegnades ai comissars esterns dla comisciun. Por la Provinzia da Balsan vëgn les materies dessura definides, aladô dl Statut de Autonomia, dal MIUR sön proposta dles 3 Intendënzes. Insciö él gnü publiché da pert dl’Intendënta Edith Ploner incö, ai 18 de jená dl 2019, les materies che reverda les scores altes ladines por l’ann de scora 2018-19.
La gran novité de chësc ann de scora é che te tröpes tipologies de scora alta reverda la secunda proa döes materies de stüde.
Por les trëi direziuns dla Scora d’Ert Cademia él gnü chirí fora les materies „Depënje“ y “Plastica y Scoltöra” (seziun de Ert figurativa), la materia „Grafica“ (seziun de Grafica) y la materia „Proietaziun y design“ (seziun de Design). Por ci che reverda la Scora Profescionala por l’artejanat artistich (seziun de “Produziuns de industria y artejanat) sará la materia d’ejam dla secunda proa „Tecnologia di prozesc produtifs“.
Tl Lizeum linguistich da La Ila gnarál ejaminé les materies „Inglesc“ y “Franzesc” tl Lizeum del Sciënzes Umanes da La Ila sará la materia “Sciënzes umanes”. Pro la seziun Aministraziun, Finanzes y Marketing dl’Istitut Tecnich Economich ITE (sides La Ila co Urtijëi) sará les materies dla secunda proa „Economia aziendala“. Pro la seziun Turism dl ITE Raetia da Urtijëi sará les proes “Disciplines turistiches y aziendales” y „Inglesc“. La tabela cun dötes les proes scrites é gnüda injuntada, te chëra che al é ince da ciafé les materies che gnará ejaminades da comissars esterns.
I ejams de Stat dles scores altes mët man ai 19 de jügn 2019 cun la pröma proa scrita. Dötadöm él scrit ite atualmënter 103 studënc y studëntes tla cuinta tlassa dles scores altes tles valades ladines, de chisc 27 scric ite tl Lizeum d’Ert, 43 tl ITE da Urtijëi y 20 a La Ila y 9 scolars fej atualmënter la cuinta tlassa di Lizeums a La Ila. Tla scora profescionala por l’ artejanat artistich da Urtijëi tolará 4 pert al ejam de Stat.
USP
