De plü contrac a tëmp indeterminé tles scores de musiga
La Junta á aprové na deliberaziun che müda i criters de azes por le personal insegnant dles scores de musiga.
Cun l’obietif da aumenté le numer di contrac a tëmp indeterminé tles scores de musiga dla Provinzia á la Junta provinziala mudé sön proposta dl presidënt y assessur por le personal Arno Kompatscher i criters d’azes por le personal insegnant. “Nosc obietif é chël da aumenté le numer di contrac a tëmp indeterminé tles scores de musiga”, á dit le presidënt Kompatscher. La deliberaziun aprovada incö ai 29 de jená prevëiga che al vëgnes conscidrá sciöche varënc i titui d’azes ales gradatöres por les scores de musiga dla Provinzia ince les abilitaziuns da insegné da pert de Stac mëmbri dl’Uniun europeica o de n Stat parifiché che ne á nia debojëgn de mosöres de compensaziun preodüs dala diretiva europeica de referimënt. Chësc porta ince para da podëi tó pert ai concurs de idoneité por ciafé n’assunziun a tëmp indeterminé.
Dötaurela él tles scores de musiga dl Südtirol indöt 400 posć a tëmp plëgn. Les scores de musiga todësces y ladines vëgn frecuentades da 17.000 scolars y studënc.
Les domandes de inserimënt tles gradatöres pó gní fates cina ai 28 de forá dl 2019. Por de plü informaziuns prëibel consulté la plata internet:
USP
