10 agn Dolomites Unesco, trëi evënc ofiziai tl Südtirol
Al é passé 10 agn dal reconescimënt Dolomites patrimone mondial Unesco. Trëi evënc ofiziai tl Südtirol.
Al é passé bele 10 agn da canche le Comité por le patrimone Unesco á lascé alsavëi ai 26 de jügn dl 2009 tratan süa 33ejima sentada a Sevilla tla Spagna, che l’Unesco â tut la dezijiun da mëte les Dolomites tla lista dl patrimone natural dl’umanité.
“L’inserimënt tla lista costituësc a livel mondial le reconescimënt plü important por n raiun sot a sconanza. I un la responsabilité de se mirité y sconé les Dolomites por les generaziuns dl dagní y da mantigní y valorisé sües particolarités” dij l’assessuria provinziala competënta Maria Hochgruber Kuenzer che é responsabla por la Provinzia de Balsan dl Comité nazional por le coordinamënt dles manifestaziuns. Sön proposta dl’assessuria provinziala á la Junta provinziala nominé ai 12 de forá le senatur dl Südtirol Meinhard Durnwalder sciöche so sostitut por rapresenté i interesc locai a livel nazional.
Por i diesc agn tröpes manifestaziuns
Dl 2019 sarál tröpes manifestaziuns tles 5 provinzies interessades dl raiun dles Dolomites patrimone Unesco por i diesc agn de Dolomites patrimone Unesco. Naota sarál na manifestaziun istituzionala dla Fondaziun Dolomites Unesco ai 8 de jügn a Cortina cun la partezipaziun di rapresentanc politics di raiuns interessá.
I evënc ofiziai tl Südtirol
En ocajiun di 10 agn dal reconescimënt Unesco por les Dolomites sarál trëi de gragn evënc dl 2019 tl Südtirol. L’evënt prinzipal por i 10 agn de Dolomites patrimone Unesco é la festa Dolomites Unesco Fest, che sará ai 29 de jügn a Al Plan de Mareo y che sará dedicada ales popolaziuns dles Dolomites. Al é n program plëgn de workshops, stands de patüc da mangé y de bona musiga. De süa organisaziun se cruziará dantadöt l’assoziaziun turistica d'Al Plan cun le sostëgn de assoziaziuns dl post desvalies y di ofizi provinziai Geologia y proes de materii, Parcs naturai, dla Repartiziun Bosć y Museum Natöra dla Provinzia de Balsan, mo ince dl Muse de Trënt, dl Ofize Geologia de Pradac, sciöche ince dles lies da munt AVS y CAI y dla Fondaziun Dolomites Unesco.
Danter les scomenciadies por mëte en pratica la strategia Dolomites UNESCO él ince chëra da realisé na seria de posć panoramics te punc particolars amesa les Dolomites. L’obietif é da sotligné la visibilité y da aumenté la cosciënza dla popolaziun locala y di ghesć da ester te n monn daldöt particolar. N evënt particolar sará insciö l’inauguraziun dl post panoramich sön les Dolomites patrimone Unesco Mastlé a Santa Cristina preodü por i 16 de jügn.
Ai 30 de setëmber gnarál a se le dé a Sest tla Val de Puster le congres scientifich Dolomites UNESCO Forum III sot la suravijiun scientifica dl’EURAC de Balsan. L’evënt é organisé dal’assoziaziun turistica dl post.
Por arjigné ca les manifestaziuns te na manira plü detaiada laora bele n grup cun a cé rapresentanc dl IDM Südtirol adöm cun la Repartiziun Natöra, Paesaje y Teritore y l’Ofize Parcs Naturai y les assoziaziuns turistiches dl teritore UNESCO. Le grup é bele atif dal 2016 tres n grup de laur che manajëia la strategia de gestiun y dl turism da pert dl Consëi aministratif dla Fondaziun Dolomites UNESCO dl 2015.
“Le reconescimënt dles Dolomites sciöche patrimone mondial UNESCO porta para na gran visibilité y atrativité por i raiuns interessá. Chësc ó ince dí na gran responsabilité sciöche düc i interessá dl setur turistich y de d’atri grups de interes de chësc teritore sá”, á dit Enrico Brutti, diretur dl Ofize Parcs naturai.
USP
