Mendranzes tla regiun: Sostigní i obietifs por le lingaz y la cultura
L'assessur regional Vallazza á baié dantadöt di obietifs di zimbri y en general dles mendranzes linguistiches dla regiun cun i rapresentanc de Lusern.
L'assessur regional Manfred Vallazza s'á incunté inier da sëra, ai 20 de merz, cun i rapresentanc dla mëndra mendranza linguistica tla regiun Trentin-Südtirol, i zimbri, na mendranza todëscia tl Trentin. L’incuntada é gnüda a se le dé tl paisc de 260 porsones de Lusern y al é gnü baié di obietifs por sconé, promöie y mantigní le lingaz y les mendranzes. Le rové adöm a Lusern porta pro al scomenciamënt de na linia de incuntades cun i rapresentanc de dötes les mendranzes reconesciüdes tla regiun, pro chëres che l'assessur regional s'informa tl detail sön i temesc che ti stá a cör y olache al dess gní ciafé sinergies por i dejiders dles mendranzes.
"Avisa por les mendranzes linguistiches él important da ciafé poscibililité de svilup che döra plü dî y dailó pó les mendranzes ti raiuns da munt se sostigní öna cun l'atra - mo datrai vál ince debojëgn de mosöres da tó atira sce la mendranza é veramënter tl prigo", á dit Vallazza che á cunté dles esperiënzes dla mendranza ladina de chëra che al fej instës pert. Tl Südtirol ti á ince oghé por ejëmpl i contribuc desvalis por i raiuns da munt ai ladins por le svilup de tramesdöes les valades, á dit l'assessur regional. Baldi n'é i paisc da munt tl Trentin nia gnüs sostignis sciöche tl Südtirol y porchël ái debojëgn de n sostëgn implü, á dit Vallazza.
"De gran importanza por mantigní na mendranza é proiec che reverda le lingaz y la cultura che ciafa ince contribuc dala Regiun", á sotrissé Vallazza che á ajunté che la junta regionala á bele tut la dezijiun ai 20 de merz da assegné sön süa proposta 80.000 euro por l'ativité di istituc culturai di zimbri.
Vallazza s'á informé sön la cultura y i obietifs da sëgn di zimbri tratan la roda fora por le paisc y canche al é jü a ti ciaré al Istitut cultural. Al'incuntada á ince tut pert l'ombolt Luca Nicolussi Paolaz, le presidënt dl Istitut cultural zimber Gianni Nicolussi Zaiga, le presidënt dl Zënter de documentaziun Fiorenzo Nicolussi Castellan, Luigi Nicolussi Castellan dl consëi aministratif dl Zënter de documentaziun, la direturia dl Istitut cultural zimber Anna Maria Trenti, la presidënta dla Comunità Altipiani Cimbri Nicoletta Carbonari, Mario Nicolussi Zom, le diretur dla Repartiziun III dla Regiun - Mendranzes linguistiches, Integraziun europeica y signories de pesc Günther Hofer y la direturia dl Ofize por les mendranzes linguistiches y la biblioteca dla Regiun Giovanna Chiocchetti.
Les desfidades "dla pice comunité plëna de vita zimbra" é a dí dl ombolt da ti dé na sburla al'economia y cherié posć de laur sön le post, sciöche ince mantigní le lingaz y la cultura a na moda da ti i dé inant ai mituns do che al é gnü tut demez la scora elementara.
L'Istitut cultural á organisé por i 9 mituns cina 6 agn cursc de lingaz y ofertes d'isté, á dit la direturia Trenti. Implü él gnü realisé materiai didatics, sostigní auturs y sües publicaziuns, fat cursc y pité metodes da studié online. Ince la colaboraziun cun d'atres mendranzes vëgn sostignida. Valur ti vëgn dé ala comunicaziun, por ejëmpl ince tres noeles scrites da d’ëi che vëgn ortiades inant ai media o tres proiec por i media nüs o le smartphone.
Tl Zënter de documentaziun ti él gnü dé na suravijiun dla storia en pert traumatica al assessur regional Vallazza. Le Zënter che vëgn vijité vigni ann da 12.000 porsones documentëia i punc storics plü importanc dl pice paisc tres mostres permanëntes y temporanes y mostra sö particolarités dla cultura o dla natöra.
Vallazza s'incunta incö, ai 21 de merz, cun i rapresentanc di ladins tl Istitut cultural ladin Micurá de Rü a San Martin de Tor y la proscima edema cun i rapresentanc dla mendranza mochena tl Istitut cultural mochen a Palai.
USP
Galaria dales fotografies
