Chiri – la crissa segura de nfurmazions
Ncuei ie unì prejentà a Bulsan l portal de crissa nuef per sculees y sculeies “Chiri”.
Duc rejona de fake news, ma co les recunescions’a? A ciuna funtana ti pudon’sa avëi crëta y co nuza pa la jëunes y i jëuni la funtanes? Na resposta a chësta dumandes pieta Chiri, l portal de crissa nuef dla Biblioteca provinziela Dr. Friedrich Teßmann, tres chël che n giata nfurmazions ejaminedes da na redazion y sun chëles che n possa se lascé.
CHIRI, l portal de crissa nuef per sculees y sculeies da 13 a 19 ani, ie online da setëmber 2018 sot a chiri.bz. Na particularità dl portal ie dlongia i tutorials de nrescida la crissa tlameda “metacrissa”: La sculees y i scueuleies mët a jì, chiran, nce na crissa tla trëi banches dac Brockhaus, Munzinger y Statista. I resultac dla crissa vën pona mustrei su spartii aldò dla banches dac.
“L azes ie puscibl da dlonch”, à sotrissà l diretëur Andresen. “Cun i dac d’azes persunei possa la sculees/i scueies ruvé tla banca dac da dut l Südtirol. Oradechël ie ënghe l layout per la nuzeda tres smartphone unì otimisà. Nsci iel scialdi saurì abiné la nfurmazions che n chier y la crissa possa unì fata a na maniera scialdi asveltà.“
Che Chiri vën tëut su scialdi bën dala sculees y dai sculeies desmostra na nrescida di dac di nuzadëures. Tla prima pert dl ann de scola à l Brockhaus abù 4.032 crisses, Statista 6.119 y Munzinger nchinamei 11.118.
Monica Kostner, la respunsabla dl proiet, tlarësc l sucrët n cont dl inuem: “Dlongia la realisazion tecnica fova la crissa de n inuem adatà na vera desfideda. Ala fin iesen unic a una de tò la parola “chiri”, –– perdrët chirí –– che, coche savon, uel dì per badiot “crì”.
Info: chiri.bz
USP
