Junta regionala en vijita dai ladins de Ampëz, Col y Fodom
L’assessur regional competënt ti á assiguré le sostëgn al grup linguistich ladin de Ampëz, Col y Fodom tratan süa vijita dan da püch.
Adöm al diretur dla Repariziun Lingac de mendranzes Günther Hofer á le assessur regional Manfred Vallazza vijité l’edema passada l’Istitut Cultural Ladin “Cesa de Jan” a Col. La delegaziun é gnüda acompagnada dal diretur dla Cesa de Jan Denni Dorigo, dala presidënta Elsa Zardini, dal vizepresidënt Paolo Frena y da Isabella Marchione.
Do la conclujiun dla Pröma Vera Mondiala passa i trëi Comuns storics ladins tl ann 1923 pro la Regiun dl Venet y vëgn insciö destacá dal Südtirol. “Sides la Regiun Venet co la Provinzia de Belun ne sostëgn nia la mendranza ladina sciöche al vëgn garantí tla Regiun Trentin-Südtirol”, á dit la presidënta Elsa Zardini, che á recordé che al vëgn chirí bele da plü agn la colaboraziun cun la Regiun Trentin-Südtirol.
“Por me él de gran importanza da sostigní le grup linguistich ladin a Ampëz, Col y Fodom y da i daidé mantigní le lingaz y la cultura y dantadöt ince la colaboraziun cun le Südtirol”, á dit Vallazza. Tosc él preodü n’incuntada di rapresentanc di Comuns ladins sura i confins provinziai fora adöm al assessur regional.
Tles edemes da denant s’á Vallazza incunté cun i rapresentanc dles mendranzes linguistiches di mocheni, zimbri y ladins dla Val Badia, de Gherdena y de Fascia.
USP
Galaria dales fotografies
