Cademia: Mostra ambulanta adum ala Caritas
La mostra ambulanta per l 20° aniverser dl servisc de consulënza per debitëures dla Caritas unirà giaurida ai 9 de mei a Bulsan.
Na mostra cun operes d’ert y cunsëies ntëur al tema scioldi, puvertà, debic y prevenzion di debic ie da udëi ti proscimi mënsc sota l moto “Degun scioldi” te deplù luesc de Sudtirol. Tla mostra ie da udëi lëures de sculeés y sculeies dl lizeum d’ert Cademia de Urtijëi y dà nce cunseies, metui a despusizion dal servisc de consulënza per debitëures dla Caritas, che festejea chëst’ann si 20° aniverser.
Sculeés y sculeies dl lizeum d’ert Cademia de Urtijëi se à dat dassënn ju, ntan chësc ann de scola, adum cun la nseniantes y nsenianc y cun i representanc dl servisc de consulënza per debitëures, cun l tema scioldi y debic, fajan deplù workshops y ancuntedes y à realisà deplù operes che reverda l argumënt. Chësta operes ie da udëi adum cun i cunsëies y l’esperienzes dl servisc de consulënza per debitëures ti proscimi mënsc te deplu luesc de Sudtirol pra la mostra ambulanta “Degun scioldi!”. Cun chësta vën sotrisseda l’atività dl servisc de consulënza per debitëures, che festejea chëst ann si 20° aniverser. L servisc dla Caritas à dal scumenciamënt a sën, judà y acumpanià plu de 20.000 persones te cuestions finazieles grieves.
La mostra unirà giaurida ai 9 de mei 2019 tla sënta prinzipela dla Caritas, tla streda Sparkasse 1, a Bulsan. Dadedò sarala da udëi te deplù luesc de dut l Sudtirol. Duc i nteressei y amanc dl ert ie nviei. L’entreda ie debant. Plu nfurmazions ie da giaté pra la “Caritas Schuldnerberatung” sota l n. de telefonn 0471-304380 o sb@caritas.bz.it
USP
