Les strotöres de formaziun ladines mët tl zënter la partezipaziun
L'assessur provinzial por la formaziun ladina á vijité dan da püch adöm al'intendënta cater strotöres de formaziun dla Val Badia.
L'imparé i lingac deboriada, la partezipaziun y l'intenüda danter scora y familia é stá i argomënc plü importanc tratan les vijites ales scolines y scores dl assessur provinzial ladin Daniel Alfreider adöm cun l'intendënta ladina Edith Ploner dan da püch tla Val Badia. Tles incuntades cun le personal dirigënt, insegnant y educatif y sambëgn ince cun les mitans y i mituns á l'assessur podü se fá n cheder de ci che al vëgn ghiré aldedaincö dales istituziuns formatives.
"Al é da amiré cun ci profescionalité, ligrëza y impëgn che les maestres y i maestri y le personal pedagogich se dá da fá tl insegnamënt y te so laur de formaziun" á dit l'assessur Daniel Alfreider. Al é evidënt che le model de scora paritetich vëgn azeté dal personal insegnant, dai geniturs y dales mitans y dai mituns y chësc pón ince odëi tl insegnamënt; sëgn se tratera da lauré fora inant chësc model y da l'adegué ales desfides atuales y dl dagní, s'á tut a dí Alfreider.
L'intendënta dles scores Edith Ploner á sotrissé le bun svilup dl sistem formatif ladin te süa complessité y á alzé fora la bona colaboraziun cun i Comuns por ci che reverda les strotöres. "Al é porchël da renforzé i potenziai y da mëte priorités nöies che tëgn cunt dal scomenciamënt inant sides dl plurilinguism che ince dla creativité dles mitans y di mituns, dles jones y di jogn."
Dla colaboraziun danter scolina y familia n'éra jüda tla scolina "Fostüs" a Badia. La coordinadëssa dla scolina Maria Valentin y la direturia dles scolines Hannelore Insam á splighé sciöche al vëgn tut en conscidraziun i bojëgns individui di 38 mituns y mitans por sostigní sües competënzes te na manira mirada. Ince les situaziuns dles families che se müda é zënzater na desfida importanta.
Deboriada cun la direturia dla scora ladina de Badia Claudia Canins y le diretur dla scora da La Val Rudi Moling é l'assessur y l'intendënta jüs tla scora elementara da La Val. Chiló él gnü metü tl zënter le plurilinguism vit: cun n proiet te trëi lingac á les scolares y i scolars mostré sö sciöche la didatica plurilinguistica integrativa funzionëia. Tla scora elementara da La Val él dötaurela 97 scolares y scolars scric ite.
A San Martin tla scora mesana él sté le diretur Heinz Videsott che á baié di proiec scolastics desvalis che é gnüs fac. Dlungia le laur sön la tematica dl'inclujiun premié da pert dla Fiera da Balsan s'á les scolares y i scolars ince dé jö cun le front dolomitich tratan la pröma vera mondiala y cun l'aplicaziun pratica dla sconanza dl clima. Tla scora elementara da San Martin él en chësc ann indöt 103 scolares y scolars che vëgn dai comuns da San Martin y La Val.
Tl zënter de scores altes a La Ila él gnü rajoné dl'atrativité dles scores altes ladines. Chiló n'él nia ma l’istitut tecnich economich cun 78 scolares y scolars, mo ince le lizeum linguistich y le lizeum de sciënzes umanes cun indöt 48 scolares y scolars. La vizedireturia Magdalena Miribung á afermé che le numer dles iscriziuns vá sö pert y che al gnará fat laurs de ressanamënt pro le comples scolastich.
Ti comuns desvalis é la delegaziun gnüda acompagnada dai ombolc Iaco Frenademetz (Badia), Angel Miribung (La Val), Giorgio Costabiei (San Martin de Tor) y a La Val dala referënta de comun competënta Rita Moling Rubatscher.
USP
Galaria dales fotografies
