Dolomites UNESCO: sön Mastlé él gnü inaudé le palch panoramich nü
Le palch panoramich nü é gnü inaudé dal’assessuria Hochgruber Kuenzer incö ai 16 de jügn y dess sotrissé l’importanza dla arpejiun naturala dles Dolomites UNESCO.
Le secundo palch panoramich amesa les Dolomites patrimone mondial UNESCO tl teritore südtirolej é gnü realisé sön Mastlé tl Comun de Santa Cristina tl parch natural Pöz-Odles. L’inauguraziun é gnüda a se le dé incö ai 16 de jügn en presënza dl’assessuria provinziala por la sconanza dl paesaje, Maria Hochgruber Kuenzer, dla direturia dla Fondaziun Dolomites UNESCO, Marcella Morandini, dl ombolt de Santa Cristina, Moritz Demetz y dl presidënt dl’assoziaziun turistica Ezio Prinoth. L’inauguraziun é un di avenimënc che fej pert dla ligna de scomenciadies por i 10 agn dal reconoscimënt dles Dolomites sciöche patrimone UNESCO.
“Ince sce al é passé 10 agn dal reconoscimënt sciöche patrimone mondial UNESCO él impó tres ciamó na cossa che nes fej n gran plajëi. Dal palch án n’odüda de gran morvëia che dess ti recordé sides ai sciori co ala jënt dl post la cosciënza dla belëza unica de chësc teritore, te chël che i viun”, á sotligné l’assessuria Maria Hochgruber Kuenzer.
La direturia dla Fondaziun Dolomites UNESCO, Marcella Morandini, á recordé te so discurs che le patrimone mondial é partí sö te nü zones y vigni zona a n aspet particolar dal punt de odüda geologich che é ince tl zënter de vigni palch panoramich che dess mostré sö les particolarités che fej aldinfora dles Dolomites n teritore tan spezial, insciö Morandini.
Le palch é gnü istalé sön n’altëza de 2.200 metri dlungia la staziun a munt dl implant portamunt Col Raiser. “Le conzet elaboré dala Fondaziun adöm ales Provinzies dl patrimone mondial por les terasses panoramiches é gnü realisé te na manira ejemplara sön Mastlé ince por merit dla buna colaboraziun cun le Comun y cun l’assoziaziun turistica”, inscö Hochgruber-Kuenzer. Le presidënt dl’assoziaziun turistica, Ezio Prinoth, á sotligné la gran importanza dla terassa por le turism. L’ombolt Moritz Demetz á stlarí i vari che á porté ala realisaziun dla strotöra.
Le palch “Dolomites UNESCO arjepon mundiela Mastlé – Santa Cristina Gherdëina”, chësta é la denominaziun ofiziala, é n proiet dl ofize provinzial Parcs naturai, metü a jí y finanzié en colaboraziun cun le Comun de Santa Cristina. La scomenciadia é ince gnüda sostignida dal ofize provinzial Geologia y proes de material y dala Repartiziun Infrastrotöres.
Le palch dl’arpejiun naturala de Gherdëna é gnü realisé aladô dl model de chël dl Strudelkopf a Toblach y an á ciaré da la frabiché te na manira scialdi sostenibla. “Porvia dl contest particolarmëntes sensibl él gnü chirí fora n obiet che é en armonia cun la contrada. Sön la strotöra, che é gnüda abelida cun les peres coiüdes adöm tles vijinanzes, él ince da odëi tres na cartina la lista dles pizes che an vëiga”, stlarësc David Messner dl studio Messner Architects che á coordiné i laurs.
File video:
Inauguraziun terassa panoramica Mastlé
USP
Galaria dales fotografies
