Inauguraziun dl punt nü sura la Gran Ega
Le punt nü sura la Gran Ega a Pedraces dëida dassënn da mioré la viabilité cuntra San Linert. Incö él gnü inauguré dales autorités de Provinzia y Comun.
Cun prësc 55 metri de lunghëza é le punt nü sura la Gran Ega tla localité de Pedraces un di punc plü lunc dla Provinzia. Le punt nü á un n pilaster sciöche ince operes de sostëgn aldinfora dl’ega y á indöt na larghëza de 12,8 metri. Le Comun de Badia y la Provinzia de Balsan á investí tl opera nöia indöt 3,65 miliuns de euro. Le punt é ma na pert dl proiet nü che tol ite ince n azes nü ala localité de San Linert. Cun l’inauguraziun gnüda a se le dé incö ai 19 de otober en presënza dl presidënt dla Provinzia Arno Kompatscher, dl vizepresidënt y assessur Daniel Alfreider y dl ombolt Iaco Frenademetz é la infrastrotöra nöia gnüda surandada ofizialmënter ala comunité. Le degan Iaco Willeit á benedí l’opera.
De bugn coliamënc tles valades
"I punc coliëia les porsones y consënt le svilup de na comunité y al é dërt da investí bun les ressurses finanziares paiades tres les cutes", á dit le presidënt Arno Kompatscher sotlignan che "un de nüsc obietifs prinzipai dla mobilité é la realisaziun de strades sigüdes te döta la Provinzia y dantadöt ince tles valades, deache ares dëida da mioré la cualité dla vita. Colié porsones y le Südtirol fej pert dl conzet de mobilité dl Südtirol", á dit le presidënt dla Provinzia Arno Komaptscher tratan la daurida ofiziala. Tl dagní sarál important da smendrí le trafich y da le planifiché te na manira che al vëgnes adoré tröc mesi ecologics y da colié dötes les formes de mobilité, insciö Kompatscher.
La sigurté al pröm post
"Cun le punt nü él poscibl da mioré de cotan l’azes cuntra San Linert, dantadöt por les corieres y i camions. Implü é le punt ince sigü tratan situaziuns de ega alta", á dit l’assessur Daniel Alfreider. Dantadöt la sigurté di punc é por nos na gran priorité y á recordé che la Provinzia á regoles dër tleres por ci che reverda la segurëza di punc. "Sön chësta strada plü leria podará passé i pendolars, lauranc, ghesc y düc chi che passa por San Linert te na manira plü sigüda, dantadöt d’invern", insciö Alfreider che á injunté "les infrastrotöres ne é nia ma operes de zement, mo ares á n rode important por l’economia y por la vita di zitadins".
Colaboraziun danter Provinzia y Comun
L’ombolt Iaco Frenademetz á laldé la buna colaboraziun danter Provinzia y Comun. "I sun contënc de avëi chësc punt che eliminëia situaziuns de prigo y che pita n azes nü ala strada dla Val Badia. Al é gnü realté n proiet che á metü man dan da 20 agn y che é öna dles infrastrotöres plü importantes dl Comun", insciö l’ombolt.
La statua de San Ojöp Frëinademetz, che é gnüda metüda sö dlungia le punt, ciara sura la sigurté de düc chi che anüza le punt. La zerimonia é gnüda abelida dala Musiga de Badia.
ASP/san
Galaria dales fotografies
