Azes nü ala Val Badia: i laurs vá inant regolarmënter
I laurs por la costruziun dla strada nöia d’azes ala Val Badia vá inant sciöche ai ê programá. La pröma esplojiun controlada por la realisaziun dl tunel é stada incö, ai 20 de jená.
Cun la pröma ciaria d’esplosif gnüda fata jí ciará incö (20 de jená) é piada ia la costruziun dl portal süd dl tunel pro l’azes nü ala Val Badia. L’assessur por la mobilité Daniel Alfreider á impié la pröma ciaria d’esplosif adöm cun le diretur dla Repartiziun Infrastrotöres Valentino Pagani y l’ombolt da San Laurënz Martin Ausserdorfer. Sön le post ê ince i ombolc Albert Palfrader (Mareo), Giorgio Costabiei (San Martin), Angel Miribung (La Val), Iaco Frenademetz (Badia) y Robert Rottonara (Corvara).
Le rî tëmp n’á nia archité i laurs
„Ince sce le rî tëmp de novëmber 2019 á intardié i laurs de segurëza dala pert dl Kniepass, vá i atri laurs dër bun inant. Dilan ala buna colaboraziun inanter i ofizi dla Provinzia, les dites de costruziun y le Comun sunse cina sëgn stá bugn da tigní ite i tëmps programá”, á splighé l’assessur provinzial por la mobilité Daniel Alfreider. Cun l’azes nü jarara da gorné damí le flus de auti che röia fora dala Val Badia y da mioré la situaziun generala dl trafich söla strada de Puster, á dit Alfreider. La realisaziun dl’entrada nöia fej pert de n conzet plü general de gestiun dl trafich söla strada de Puster. “I orun mioré le flus dl trafich y chësc pon arjunje cun infrastrotöres nöies, mo ince fajon crësce l’oferta dles ferates y dles corieres.
L’ombolt da San Laurënz Martin Ausserdorfer á rengrazié dla buna colaboraziun y sotrissé “che la cooperaziun inanter la Provinzia y le Comun á fat garaté dër bun le proiet. Adöm cun i tecnics él tres gnü chirí deboriada dô soluziuns, chësc vel ince por les dites de costruziun, che desmostra n gran respet por la popolaziun”, insciö Ausserdorfer. I laurs é cina sëgn gnüs fac cun tröpa profescionalité y zënza de gran problems por la popolaziun. Döta la comunité da San Laurënz apeta ert dô la conclujiun de chësc proiet tan important, stlüj jö Ausserdorfer.
Dala pert nord bele ciavá 78 metri
Le diretur de repartiziun Valentino Pagani á cunté di laurs fac cina sëgn y splighé plü avisa i proscimi vari. “Le grup de dites Strabag, Alpenbau, Moser & CO. y Geobau é sëgn tl laur da ciavé i 990 metri de tunel dala pert dl lech artifizial dl Kniepass y da arjigné ca da fá sö le punt”, insciö Pagani. Cina sëgn é gnüs ciavá 78 metri de tunel. Tl proiet vëgnel ince integré la planificaziun de n tru dala roda che dess passé dô rü y sot le punt nü fora, por favorí ciamó deplü la mobilité dles rodes. L’ombolt da Corvara Robert Rottonara á sotrissé, ince a inom de sü colegs dla Val Badia, l’importanza che chësc azes nü á por l’economia y le turism de döta la valada.
Preodü é n rondel nü
La Provinzia, le grup de dites y le Comun da San Laurënz s’á metü a öna por porté a n mioramënt dl azes nü: impede n’incrujada sön plü liví é sëgn preodü n rondel sura la strada de Puster, cun entrades y sortides da dötes les direziuns. L’azes nü ala Val Badia cun le tunel a Pflaurenz mët man dlungia l’incrujada che porta tla zona artejanala Aue y se röia cun le coliamënt ala strada de Puster (SS 49). La strada d’azes pëia ite zirca 400 metri dan le tunel de Ciastelbadia cun n rondel sura la strada de Puster. Ara passa sura le lech artifizial dl Kniepass fora, vá ite tl Klosterwald cina dô la linia dla ferata cun en punt de 140 metri y röia spo te n tunel de prësc un n chilometer che la coliëia a süd cun la stada da sëgn che condüj tla Val Badia.
USP
Galaria dales fotografies
