Coronavirus: Scores y scolines da indoman sarades ince tl Südtirol
Dötes les istituziuns scolastiches restará stlütes te döta la Talia cina ai 15 de merz. Chësta dezijiun é gnüda tuta dal premier Conte por la sigurté dla sanité. La mosöra vëgn atuada ince tl Südtirol
Da indoman, jöbia ai 5 de merz cina ai 15 de merz restará dötes les istituziuns scolastiches sarades te döta la Talia. Le premier Giuseppe Conte á firmé incö ai 4 de merz le decret por stravardé la sanité di zitadins y archité la zircolaziun dl virus corona (COVID-19). Deache al se trata de na mosöra de prevenziun por la sigurté dla sanité á chësta mosöra valüta automaticamënter por döta la Provinzia. Ara reverda les istituziuns de assistënza di mituns cina ai 3 agn, dles scolines, dles scores y dla Université.
La Junta provinziala á bele tigní na sentada incö domisdé por se arjigné ca ala situaziun y planifiché les prömes mosöres de acompagnamënt. Insciö ne gnará gnanca i sorvisc de sostëgn, mensa y trasport di scolars organisá.
Regoles por manifestaziuns y incuntades
Implü él ince preodü dal decret statal che al mëss ince gní desdit manifestaziuns publiches – sides de forma privata co publica – sce al ne vëgn nia garantí na destanza de segurëza de almanco un n meter danter les porsones presëntes. Competiziuns sportives y alenamënc pó ma gní organisá zënza la presënza de publich. Fá sport de basa y ativités alaleria y daite é ma autorisades te chi caji che al vëgn garantí la destanza minima de un n meter.
Daldöt mëss gní desdit scomenciadies sciöche incuntades, congresc y meetings a chi che le personal dla sanité tol pert – sciöche ince personal che garantësc le funzionamënt di sorvisc de basa de interes publich. Ince te chisc caji é le decret en forza dai 5 merz.
Regoles generales de comportamënt
En ajunta ales regoles de comportamënt generales él ince gnü definí regoles tleres por ci che reverda le comportamënt tl pröm socurs o tratan les vijites te ciases de palsa y de cura. Al é important da fá conësce ai vijitadus y da respeté chëstes regoles.
Le govern dla Talia á anunzié mosöres de sostëgn
Incö á le govern implü anunzié n pachet cun mosöres de sostëgn por lauranc y daturs de laur. Al é preodü n'incuntada n vëndres danter la Junta provinziala y i partners soziai por rajoné sön mosöres preodüdes y nezesciares.
L'Aministraziun provinziala vëgn informada tresfora. Sön la tematica dl coronavirus él gnü cherié na plata internet aposta, che an ciafa sot a www.sabes.it/coronavirus o www.provinz.bz.it/sicherheit-zivilschutz/zivilschutz/coronavirus.asp.
rc
