Jonëza: Löm vërda dala Junta al program anual
La Junta provinziala á aprové le program anual por la promoziun dl sorvisc ai jogn ladin sön proposta dl’assessur ala scora y cultura ladina y ala jonëza Daniel Alfreider.
Löm vërda da pert dla Junta provinziala al plann anual por la promoziun dl sorvisc ai jogn dl grup linguistich ladin por l'ann 2020. Do l'arat positif dla Consulta é sëgn le plann gnü aprové dala Junta provinziala sön proposta dl assessur por la scora, cultura y jonëza ladina Daniel Alfreider. “Investí tles organisaziuns dla jonëza é n aspet fondamental por ti dé la poscibilité ales jones y ai jogn da se svilupé inant tres n’oferta ampla de iniziatives. I Sorvisc ai Jogn de Gherdëna y dla Val Badia laora te na manira dër profescionala y é n gran aiüt por les families, scores y sozieté”, dij l’assessur Daniel Alfreider. Cun le ressanamënt dla Ütia de Pütia él gnü lapro n punt de incuntada tla natöra nia ma por i jogn dles valades ladines, mo de döt Südtirol y sura i confins fora, insciö Alfreider.
“La maiú sfida é sënz’ater chëra de renforzé la relaziun danter familia, scora y comunité, al è important odëi le sostëgn dl sorvisc por la jonëza sciöche na responsabilité coletiva, n punsé interatif olache les forzes y les deblëzes se avaliëia fora reziprocamënter. Öna dles priorités dl program é ince la formaziun dl personal che laora pro i Sorvisc ai Jogn y Nëus Jëuni Gherdëina”, sotrissëia Carla Pedevilla, la responsabla dl Ofize Jonëza dl Departimënt Scora y Cultura ladina.
Le plann prevëiga ince la poscibilité da adoré personal pedagogich spezialisé tles organisaziuns joniles, ti sorvisc ai jogn y ti zëntri dla jonëza. Por la pomoziun dles ativités y di programs él preodü indöt 328.000 euro sot forma de contribuc. Implü él preodü da investí 20.000 euro por ressané le local di jogn da La Plí. Por la formaziun interna di colaboradus y dles colabradësses él gnü metü a bilanz 11.400 euro. Indöt vëgnel insciö metü a desposiziun söporjö 360.000 euro.
Le plann regolamentëia danter l'ater l’ampliamënt y le sostëgn finanziar dles infrastrotöres di jogn, la promoziun dles ativités, di proiec y di programs straordinars a bëgn dla jonëza. Implü se dá le plann ince jö cun le regolamënt sön les inrescides scientifiches, la conzesciun di contribuc promozionai y le program dles ativités dl Ofize Jogn dl Departimënt Scora y Cultura ladina.
rc
